កីឡាករគុនខ្មែរជើងចាស់ ស សី បានផ្ញើសារលើកទឹកចិត្តឲ្យកីឡាករគុនចម្រុះ (MMA) នៅកម្ពុជា ខិតខំហ្វឹកហាត់ព្រោះថា បច្ចុប្បន្នតម្លៃខ្លួនល្អប្រសើរពេលចេញទៅប្រកួតលើឆាកអន្តរជាតិ។ ការផ្ញើសារដ៏មានសារសំខាន់នេះ ដោយសារបុរសវ័យ ៣៧ ឆ្នាំខាងលើហាក់ចាកឆ្ងាយពីសង្វៀនព្រោះវ័យកាន់តែជ្រេ កម្លាំងធ្លាក់ចុះ និង គ្រួសារផ្ទាល់ប្រាប់ថាឈប់វ៉ៃទៅកុំឲ្យខ្មាសក្មេងៗ។
កូនសិស្សរបស់លោក អេ ភូថង ផ្ដល់ពាក្យលើកទឹកចិត្តដល់យុវជនជំនាន់ក្រោយថា: ទោះសង្វៀន ONE Championship យើងមិនបានឡើងវ៉ៃរាល់សប្ដាហ៍ ឬ ១ ខែម្ដង ប៉ុន្តែក៏បានតម្លៃខ្លួនគួរសមអាចផ្គត់ផ្គង់គ្រួសារបាន។ ដូច្នេះអ្នកខ្លាំងៗ ដូច ឡៅ ចិត្រា ឬ គង់ សំបូរ ជាដើមក៏ទទួលបានការចាប់គូដែរថ្មីៗនេះ។ សីទទួលចំណាត់ថ្នាក់លេខ៤ក្នុងកម្មវិធីប្រដាល់ខ្សែក្រវាត់នៅសង្វៀនស៊ីធីអិនកាល ១០ ឆ្នាំមុនបានរំលឹកអំពីផលលំបាកហ្វឹកហាត់ គុនចម្រុះថា មានលក្ខណៈស្មុគស្មាញជាងហាត់គុនខ្មែរ ដោយសារត្រូវប្រើកម្លាំងខ្លាំងប្រើក្បាច់គាប ឃ្លេបំបាក់ ក្បាច់ដោះ និងបោកជាដើម។
មិនត្រឹមតែប៉ុណ្ណោះសោត កូនសិស្សរបស់លោក ឈិត សារឹម ក៏ទទូចឲ្យអ្នកលេងគុនខ្មែរខំប្រឹងហ្វឹកហាត់ដូចគ្នា ជាពិសេសសង្វៀន ONE Championship ដែលទទួលបានតម្លៃខ្លួនក្រាស់ក្រែលអាចជ្រោងជីវភាពគ្រួសារនោះតែងតែត្រូវការកីឡាករទៅប្រកួតជាប្រចាំក្នុងប្រភេទ Kickboxing (វ៉ៃសេរីតែបិទកែង) ស្របពេល សង្វៀនក្នុងស្រុកក៏កើនតម្លៃខ្លួនច្រើនគួរសមដែរ។
ស្ថិតក្នុងវ័យ ៣៧ ឆ្នាំ ស សី ចូលហ្វឹកហាត់ជាមួយគ្រូ ណុល នៅស្រុកមុខកំពូលតាំងពីរៀនថ្នាក់ទី ៥ មកម៉្លេះ មុន បន្តហ្វឹកហាត់ជាមួយគ្រូ សឹង សារិទ្ធ នៅក្លឹបទ័ពជើងទឹក, គ្រូ អេ ភូថង នៅក្លឹបអេភូថង និង គ្រូ ឈិត សារឹម នៅក្លឹបក្រសួងការពារជាតិ។ មុនប្រកួតក្បាច់គុនចម្រុះនៅឆ្នាំ ២០១៦ ស សី ចូលហ្វឹកហាត់ក្បាច់គុនចម្រុះ (MMA) នៅអំឡុងឆ្នាំ ២០១៥ ជាមួយគ្រូហ៊ុន ច័ន្ទរាជ្យ និង គ្រូបរទេសម្នាក់ទៀត។
មិនតែប៉ុណ្ណោះរូបគេបានឡើងប្រកួតលើសង្វៀនក្បាច់គុនចម្រុះបានចំនួន ៨ ដងដែលក្នុងនោះ ឈ្នះ ៤ ដង និង ចាញ់ ចំនួន ៣ ដង គិតចាប់តាំងឆ្នាំ ២០១៦ មក។ ស សី ប្រកួតចុងក្រោយចាញ់កីឡាករចិន Xie Bin នៅសង្វៀន ONE: REIGN OF KINGS កាលខែ កក្កដាឆ្នាំ ២០១៨ នៅក្រុងម៉ានីល ប្រទេស ហ្វីលីពីន៕
កូនសិស្សរបស់លោក អេ ភូថង ស សី ផ្ញើសារលើកទឹកចិត្តដល់កីឡាករគុនចម្រុះវ័យក្មេងនៅកម្ពុជា
អត្ថបទទាក់ទង
