អតីតអ្នកប្រដាល់ជើងខ្លាំងរបស់កម្ពុជាជំនាន់ឆ្នាំ ១៩៩០ លោក អេ ភូថង ថាទទួលបានចំណេះដឹងថ្មីៗច្រើនពីការសិក្សាវគ្គរៀបចំផែនការ និងទ្រឹស្ដី របស់ក្រសួងអប់រំ យុវជន និងកីឡា រយៈពេល៣ថ្ងៃនេះ។
លោកគ្រូ អេ ភូថង បានឲ្យដឹងថា សិក្ខាសាលារយៈពេល៣ថ្ងៃនេះមានពិតជាមានសារសំខាន់ណាស់ ដល់ពួកលោកជាគ្រូជម្រើសជាតិ ក៏ដូចជាគ្រូថ្នាលនានាទាំងអស់។ សិក្ខាសាលានេះ គឺបង្រៀនពីផែនការថ្មី ក្នុងការបង្ហាត់ប្រៀនសិស្ស មិនថាហ្វឹកហាត់ជំនាញ ការហ្វឹកហាត់កម្លាំង ការបង្រៀនចិត្តសាស្ត្រដល់កីឡាករ និងថែទាំសុខភាពថែមទៀតផង។
អតីតអ្នកប្រដាល់គុនខ្មែររូបនេះបន្ថែមទៀតថា បន្ទាប់ពីឆ្លងកាត់វគ្គនេះហើយ លោកនឹងយកអ្វីដែលបានរៀននេះទៅបង្ហាត់បង្ហាញ ដល់ក្រុមកីឡាករជម្រើសជាតិរបស់ពួកលោក ដើម្បីពង្រឹងសមត្ថភាពឈានទៅរកមេដាយក្នុងព្រឹត្តិការណ៍កីឡាស៊ីហ្គេមលើកទី៣០ នៅឯប្រទេសហ្វីលីពីនចុងឆ្នាំនេះ។
រំលឹកដែរថា ក្រសួងអប់រំ យុវជន និងកីឡា បានបើកសិក្ខាសាលាស្ដីអំពីការរៀបចំផែនការ និងទ្រឹស្ដី រយៈពេល៣ថ្ងៃ ចាប់ពីថ្ងៃទី២២-២៤ ខែមេសា ឆ្នាំ២០១៩ នៅអគារហ្វឹកហ្វឺនកីឡាថ្មីជាប់ពហុកីឡដ្ឋានជាតិ។ សិក្ខាកាមចូលរួមមាន ១៦៥នាក់ ជាគ្រូជម្រើសជាតិ គ្រូថ្នាល និង១០នាក់ជាគ្រូជនពិកា៕
អត្ថបទ៖ នួន ស៊ីណា Credit: Sabay
អេ ភូថង ឆ្លងកាត់វគ្គបណ្ដុះបណ្ដាល៣ថ្ងៃរបស់ក្រសួង ចេះវិធីសាស្ត្រថ្មីច្រើនត្រៀមចែករំលែកសិស្ស
អត្ថបទទាក់ទង
