ក្រុមហ៊ុន Nielsen Sports ដែលគេស្គាល់ថាជាក្រុមហ៊ុនផ្គត់ផ្គង់ការវិភាគ និង ការផ្ដល់ទិន្នន័យឈានមុខសម្រាប់ស្ថាប័នកីឡាធំៗក្នុងលោកនោះសហការជាមួយ ONE Championship ដើម្បីរៀបចំសិក្ខាសាលាមួយឈ្មោះថា «Nielsen Presents: What’s Next in Global Sports» ។ នេះជាកម្មវិធីផ្តោតលើភាពជាអ្នកដឹកនាំនិងជំនួញលើវិស័យកីឡាក្នុងលោក ចាប់ពីថ្ងៃទី ១៦ ដល់ ១៧ ខែ ឧសភា ឆ្នាំ ២០១៩ នៅប្រទេសសិង្ហបុរី។
កិច្ចប្រជុំនេះមានការចូលរួមពីសំណាក់ ថ្នាក់ដឹកនាំម៉ាកយីហោកីឡាល្បីៗ , អ្នកជំនួញ, ភ្នាក់ងារ និង ប្រព័ន្ធផ្សព្វផ្សាយ ដើម្បីពិភាក្សាអំពីទំនោរនៃទីផ្សារកីឡាពិភពលោក និង ស្រាវជ្រាវរកចំណុចចាំបាច់ដែលត្រូវតភ្ជាប់ពីអ្នកគាំទ្រ និង ស្ថាប័នជាដើម។ មុនបិទបញ្ចប់កម្មវិធី កីឡាករហែលទឹកទឹកសញ្ជាតិអាមេរិក Michael Phelps ដែលឈ្នះមេដាយមាសច្រើនជាងគេនៅព្រឹត្តិការណ៍កីឡាអូឡាំពិកនោះនឹងឡើងលើវេទិកាដើម្បីថ្លែងសុន្ទរកថាបញ្ចប់កម្មវិធីនៅថ្ងៃចុងក្រោយទី ១៦ ឧសភា ផងដែរ។ ហើយ កីឡាករហែលទឹក Joseph Schooling ដែលជាម្ចាស់មេដាយមាសព្រឹត្តិការណ៍កីឡាអូឡាំពិកក្នុងប្រវត្តិសាស្ត្ររបស់សិង្ហបុរី ក៏បង្ហាញវត្តមានក្នុងកម្មវិធីនេះដែរ។
លោក Kelvin Watt អគ្គនាយកនៃក្រុមហ៊ុន Nielsen Sports ប្រចាំនៅអាស៊ីប៉ាស៊ីហ្វិក និងតំបន់អាហ្វ្រិកកណ្ដាល បានថ្លែងថា៖ « នេះជាឧទាហរណ៍គំរូមួយសម្រាប់កីឡានៅក្នុងពិភពលោក ដែលកំពុងចូលខ្លួនមកកាន់តំបន់អាស៊ី ហើយអ្នកវិនិយោគចង់ឲ្យស្ថាប័នរបស់ខ្លួនទទួលស្គាល់ជុំវិញពិភពលោក។ ការសហការគ្នាជាមួយ ONE Championship ពិតជាសំខាន់ណាស់ក្នុងគោលដៅធ្វើឲ្យកីឡានៅអាស៊ីកាន់តែរីកចម្រើន និង ទទួលស្គាល់ជាសកល»។
ទន្ទឹមគ្នានេះលោក Chatri Sityodtong ប្រធាន និងជានាយកប្រតិបត្តិនៃ ONE Championship បានមានប្រសាសន៍ថា៖«នេះជាផ្នត់គំនិតដ៏អស្ចារ្យបំផុតនៅក្នុងកីឡានិងការធ្វើជំនួញ ដែលត្រូវបង្ហាញនៅក្នុងកម្មវិធី “What’s Next in Global Sports”។ វាជាកិត្តិយសណាស់ដែល ONE Championship ធ្វើការយ៉ាងជិតស្និទ្ធជាមួយ Nielsen ដើម្បីបង្កើតឲ្យសិក្ខាសាលាប្រចាំឆ្នាំលើកទី២នេះ»។ វាជាការធ្វើសមាហរណកម្មរវាងកីឡានិងជំនួញ។ កម្មវិធីនេះនឹងចាប់ផ្ដើមដោយមានការពិសាអាហារជុំគ្នាពេលល្ងាចនៅថ្ងៃទី ១៦ ឧសភា នៅ Gardens by the Bay មុនកិច្ចប្រជុំផ្ដោតលើប្រធានបទមួយទៀតឈ្មោះថា “Sports Business Conference” នៅឯ Marina Bay Sands នាថ្ងៃទី ១៧ ឧសភា។
គួរដឹងដែរថា ONE Championship (ONE) ជាស្ថាប័នរៀបចំព្រឹត្តិការណ៍កីឡាដ៏ធំបំផុតដែលមានប្រវត្តិយូរលង់នៅក្នុងទ្វីបអាស៊ី និងមានអ្នកទស្សនារាប់លាននាក់។ ONE មានស្នាក់ការកណ្ដាលនៅសិង្ហបុរី ដែលជាស្ថាប័នរៀបចំការប្រកួតកីឡាគុនចម្រុះធំជាងគេបំផុតនៅក្នុងលោកប្រជុំដោយក្បាច់គុនល្បីៗដូចជា មួយថៃ Kickboxing, ការ៉ាតេ កុងហ្វូ ស៊ីឡាត សាន់ដា(Sanda), ឡែតវ៉េ(Lethwei), គុនចម្រុះ(MMA), តេក្វាន់ដូ, និង ចំបាប់ជាដើម។
ONE Championship ផ្សព្វផ្សាយទៅកាន់ទស្សនិកជនមានសក្ដានុពលប្រមាណ ២,៦ ពាន់លាននាក់ទូទាំងពិភពលោកជាង ១៤០ ប្រទេស ដែលក្នុងនោះផ្សាយតាមប្រព័ន្ធផ្សព្វផ្សាយល្បីៗដូចជា Fox Sports, ABS-CBN, Astro, ClaroSports, Startimes, Thairath TV, Skynet, Mediacorp, Great Sports, Tencent, Star TV, Mediaset Italia, ProSiebenSat.1, Dubai Sports, Turner Sports, និង មានប្រព័ន្ធផ្សព្វផ្សាយជាច្រើនទៀត៕
Credit: Bayontv
ក្រុមហ៊ុន Nielsen Sports សហការជាមួយ ONE Championship រៀបចំសិក្ខាសាលាស្តីអំពីភាពជាអ្នកដឹកនាំ និងជំនួញក្នុងវិស័យកីឡា
អត្ថបទទាក់ទង
