កីឡាករ សុខ ធី បានត្រៀមខ្លួនរួចរាល់ហើយ ដើម្បីជួបជើងខ្លាំងថៃ Rodtang Jitmuangnon ក្នុងព្រឹត្តិការណ៍ ONE: WARRIORS OF LIGHT នាទីក្រុងបាងកក ប្រទេសថៃ នាល្ងាចថ្ងៃទី១០ ខែឧសភាស្អែក ស្របពេលលោក ហ៊ុន ចាន់រាជ បានស្នើអ្នកគាំទ្រត្រូវជឿជាក់លើសមត្ថភាព សុខ ធី មិនត្រូវវាយតម្លៃលក្ខណៈមើលងាយសមត្ថភាពអ្នកលេងគុនខ្មែររូបនេះឡើយ ។
កីឡាកររហស្សនាម “កាកា” បានបញ្ជាប់ក្រុមការងារទូរទស្សន៍ BTV-News នៅប្រទេសថៃថា ការប្រកួតស្អែកនេះ គឺជាជំនួបដ៏អស្ចារ្យរបស់ខ្លួន ដ្បិតរូបគេ ប៉ងជួប Rodtang ជាយូរមកហើយ ។ បន្ថែមលើនេះ សុខ ធី បានបង្ហើបថា នឹងប្រើយុទ្ធសាស្ដ្រថយទាត់ និងថយម៉ាត់ ដើម្បីទល់ទល់ជាមួយអ្នកប្រដាល់ថៃរូបនេះ ព្រោះ សុខ ធី បានទស្សន៍ទាយទុកថា Rodtang នឹងសម្រុកវាយមកលើខ្លួនមុន ។
ទន្ទឹមជាមួយគ្នា ប្រធានក្លឹប Cambodian Top Team និងជាអ្នកដឹកនាំកីឡាករខ្មែរ ចូលរួមក្នុងព្រឹត្តិការណ៍ ONE បានបញ្ជាក់ថា ដ្បិតមើលទៅ សុខ ធី រាងក្មេងខ្ចីជាង Rodtang តែអ្នករៀបចំកម្មវិធី ONE មិនមែនចេះតែចាប់គូប្រកួតនោះទេ ត្រូវអ្នកគាំទ្រត្រូវជឿជាក់ និងលើកទឹកចិត្ត សុខ ធី សម្រាប់ការបង្ហាញខ្លួនលើកទី៣ លើសង្វៀន ONE ស្អែកនេះ ។ ការលើកឡើងបែបនេះ គឺលោកចង់ឆ្លើយតបទៅនឹងអ្នកគាំទ្រមួយចំនួន ដែលលើកឡើងថា សុខ ធី ប៉ះ Rodtang ប្រៀបបានយកពងមាន់ជល់នឹងថ្ម ។
គួរបញ្ជាក់ថា នេះគឺជាលើកទី៣ ដែល សុខ ធី ត្រូវបានស្ថាប័ន ONE Championship ចាប់គូប្រកួត ហើយជួបសុទ្ធតែជើងខ្លាំងៗលំដាប់ពិភពលោករបស់ថៃ តួយ៉ាងចូលរួម ២លើកមុន កាលពីឆ្នាំ២០១៨ សុខ ធី បានជួបកីឡាករជើងចាស់ Lerd Sila របស់ថៃ តែគួរឲ្យស្ដាយ គេបានបរាជ័យដោយពិន្ទុទាំង ២លើក ។ តែលើកនេះ សុខ ធី បានប្ដេជ្ញានឹងខិតខំឲ្យអស់ពីសមត្ថភាព ដើម្បីស្ដារមុខមាត់ខ្លួន និងដណ្ដើមកិត្តិយសជូនជាតិវិញ ៕
Credit: BTV Cambodia
គ្រូបង្វឹកហ៊ុន ចាន់រាជ ស្នើអ្នកគាំទ្រត្រូវជឿជាក់លើសមត្ថភាពរបស់អ្នកប្រដាល់កម្ពុជាសុខ ធី ពេលប៉ះ Rodtang
អត្ថបទទាក់ទង