អ្នកប្រដាល់គុនខ្មែរ២រូប បើមានសមត្ថភាពខ្លាំងនឹងឈ្នះខ្សែក្រវាត់ WLC ២គ្រឿង

វត្តមានសង្វៀនរបស់ មីយ៉ាន់ម៉ា WLC ដែលគ្រោងរៀបចំនៅកម្ពុជានាខែសីហា ២០២០ ខាងមុខនេះ នឹងរៀបចំឲ្យកីឡាករជើងខ្លាំងគុនខ្មែរ ៤រូបប្រកួតម៉ារ៉ាតុងដណ្ដើមខ្សែក្រវាត់១គ្រឿង ខណៈអ្នកលេងគុនខ្មែរម្នាក់ទៀតវ៉ៃដណ្ដើមខ្សែក្រវាត់១គ្រឿងទៀតពីបរទេស។

នេះបើតាមលោក ហ៊ុន ច័ន្ទរាជ្យ អនុប្រធានសង្វៀន WLC ដែលនឹងរៀបចំនៅពេលខាងមុខនេះ លើកឡើងថា ខាងកម្មវិធីនឹងរៀបចំការប្រកួតមិត្តភាពផង ម៉ារ៉ាតុង រួមនិងការប្រកួតដណ្ដើមខ្សែក្រវាត់ថែមទៀតផង។

ចំពោះការប្រកួតដណ្ដើមខ្សែក្រវាត់គឺកំពុងតែគិតថា ដាក់ឲ្យវ៉ៃទម្ងន់ ៥៧ ឬ ៦០គីឡូក្រាម។ កីឡាករ៤រូបត្រូវប្រកួតម៉ារ៉ាតុងរកម្ចាស់ខ្សែក្រវាត់ថ្ងៃនោះតែម្ដង។ ចំណែកការប្រកួតដណ្ដើមខ្សែវិញ ឥលូវអ្នករៀបចំកំពុងគិតថាត្រូវយកកីឡាករជើងខ្លាំងខ្មែររូបណា ដែលមានសមត្ថភាពខ្លាំង ដើម្បីឲ្យការប្រកួតនោះល្អមើល និងប្រហាក់ប្រហែលគ្នា។ អនុប្រធានរូបនេះបញ្ជាក់ថា កីឡាករដែលនឹងត្រូវប្រកួតខ្សែក្រវាត់នោះគឺខាងរៀបចំកម្មវិធីយកតែអ្នកខ្លាំងៗនោះទេ។

រំលឹកដែរថា កម្មវិធីប្រដាល់ WLC របស់ប្រទេសមីយ៉ាន់ម៉ា គ្រោងនឹងរៀបចំការប្រកួតដំបូងលើទឹកដីកម្ពុជានាខែសីហា ឆ្នាំ២០២០ខាងមុខនេះ៕

អត្ថបទ៖ នួន ស៊ីណា Credit: Sabay