កីឡាករកម្ពុជា អេលីត ចំរើន (លី សុជាតិ) មកពីក្លិបឆ្មាសសែនសុខ បានផ្តួលជើងខ្លាំងរបស់ថៃ Khav krachang ឲ្យសន្លប់ធំ ដោយក្បាច់ជង្គង់ នៅត្រឹមទឹកទី ៤ ដើម្បីកក់កៅអីនៅវគ្គពាក់កណ្តាលផ្តាច់ព្រ័ត្រតំណាងឲ្យពូលកម្ពុជារួចជាស្រេចក្នុងការប្រកួតគុនខ្មែរដណ្តើមខ្សែក្រវាត់ KIC ប៉ុន្តែ ម៉ន សាម៉េត របស់ក្លិបកងចក្ររាជសីហ៍ ប្រឹងអស់លទ្ធភាព តែបានឈ្នះថៃ Noeng Thavath ត្រឹមពិន្ទុ ហើយលទ្ធផលនេះ បានធ្វើឲ្យរូបគេនៅមិនទាន់មានភាពប្រាកដក្នុងការបានឡើងទៅវគ្គបន្តនៅឡើយទេ។
ការផ្តួលថៃឲ្យសន្លប់នៅលើសង្វៀន Sky one កាលពីយប់ថ្ងៃអាទិត្យនោះ បានធ្វើឲ្យ ៤ ប្រកួតរបស់ អេលីត ចំរើន ឈ្នះទាំងអស់ មាន ១២ ពិន្ទុពេញ ក្នុងនោះផ្តួលដៃគូឲ្យសន្លប់បាន ៣ ដង គឺទឹកទី ១ មួយដង និងទឹកទី ៤ ពីរដង ហើយលទ្ធផលនេះ បានជួយឲ្យ ចំរើន ជាប់ចំណាត់ថ្នាក់លេខ ១ ក្នុងពូលកម្ពុជា និងបានឡើងទៅវគ្គពាក់កណ្តាលផ្តាច់ព្រ័ត្រជាស្រេច ដោយមិនចាំបាច់អ៊ុតបាល់មើលការប្រកួតចុងក្រោយរបស់ មាស សារ៉ាក់ នោះឡើយ។
ផ្ទុយទៅវិញ ម៉ន សាម៉េត ក៏មាន ១២ ពិន្ទុពេញ ជាមួយការឈ្នះទាំង ៤ ប្រកួតដែរ ប៉ុន្តែការឈ្នះត្រឹមពិន្ទុលើ Noeng Thavath វាមិនទាន់អាចកំណត់ពីជោគវាសនាថា បានឡើងទៅវគ្គបន្ត ឬយ៉ាងណាទេ គឺ សាម៉េត ត្រូវរង់ចាំលទ្ធផលប្រកួតចុងក្រោយរបស់មិត្តរួមជាតិ មាស សារ៉ាក់ ជាមួយថៃ Lafan សិន ព្រោះ ៣ ប្រកួតកន្លងមក សារ៉ាក់ បានឈ្នះទាំងអស់ផងដែរ។
យោងទៅតាមរូបមន្ត និងលក្ខខណ្ឌប្រកួត គឺបើ មាស សារ៉ាក់ ឈ្នះថៃ Lafan ត្រឹមពិន្ទុ ក៏មិនអាចឡើងបានដែរ ព្រោះជ័យជម្នះ ៤ លើករបស់ ម៉ន សាម៉េត គឺឈ្នះពិន្ទុ ២ ដង និងផ្តួលគូប្រកួតឲ្យសន្លប់ទឹក ២ ម្តង និងទឹក ៤ ម្តង។ កីឡាករ មាស សារ៉ាក់ អាចបានឡើងទៅវគ្គបន្តបាន លុះត្រាតែគេអាចផ្តួល Lafan ឲ្យសន្លប់ត្រឹមទឹកទី ២ ក្នុងនាទីខ្លីជាង ម៉ន សាម៉េត ពេលផ្តួល Khavkrachang។
ម៉ន សាម៉េត បាននិយាយក្រោយការប្រកួតឈ្នះត្រឹមពិន្ទុថា៖ «ខ្ញុំចង់វាយផ្តួល Noeng Thavath ឲ្យសន្លប់ តែមិនអាចធ្វើទៅបាន ព្រោះវាគេចបានលឿន និងមិនសូវហ៊ានប្រឈមជាមួយ ហើយខ្ញុំបោះជង្គង់ចូលសិចៗ ចំគោលដៅបានល្អ តែមិនអាចឲ្យគេសន្លប់បាន។ ទោះជាយ៉ាងណា ខ្ញុំនៅមិនទាន់អស់សង្ឃឹមនោះទេ ព្រោះខ្ញុំគិតថា សារ៉ាក់ មិនអាចផ្តួលថៃ Lafan ឲ្យសន្លប់លឿន មុនទឹកទី ២ នោះឡើយ»។
ចំណែក លោក ភួង ពុទ្ធិ នាយកគ្រប់គ្រងការប្រកួតប្រចាំសង្វៀន Sky one បាននិយាយថា ដោយផ្អែកលើរូបមន្ត និងច្បាប់ប្រកួត ដែលបានកំណត់នោះ កីឡាករកម្ពុជាចំនួនតែ ២ រូបប៉ុណ្ណោះ ត្រូវឡើងទៅប្រកួតនៅវគ្គពាក់កណ្តាលផ្តាច់ព្រ័ត្រ ជាមួយកីឡាករថៃចំនួន ២ នាក់ទៀត ដែលទទួលបានលេខ ១ និងលេខ ២ ប្រចាំពូលថៃ។
លោកបានបន្តថា៖ «បើ ម៉ន សាម៉េត មានឱកាសបានឡើងទៅវគ្គបន្តការប្រកួតខ្វែង អាចនឹងល្អមើលបំផុត ព្រោះ ម៉ន សាម៉េត ជាកីឡាករខ្លាំងជើងចាស់វស្សា ឯ អេលីត ចំរើន ជាជើងខ្លាំងលំដាប់ថ្មី ហើយពួកគេអាចនឹងជួបគ្នា វគ្គផ្តាច់ព្រ័ត្រ នៅពេលដែលពួកគេឈ្នះថៃដូចគ្នានោះ»៕
សូមចុចលីងនេះដើម្បីលៃផេកផងអរគុណច្រើន Usportkh CamsportNews Real Madrid C.F Boxing Football Boxing ដឹងគ្រប់យ៉ាង