នៅទីបំផុតកីឡាករ អេលីត ចំរើន បានរកឃើញជ័យជម្នះយ៉ាងធំ នៅក្នុងអាជីពរបស់ខ្លួន គឺការឈ្នះខ្សែក្រវាត់មាស ទម្ងន់៥៧គីឡូក្រាម រដូវកាលទី៣ នៅសង្វៀន PNN បន្ទាប់ពីរូបគេ បានទាត់ឲ្យម្ចាស់មេដាយសំរឹទ្ធស៊ីហ្គេម វ៉ាន់ វឿន ខូចដៃស្តាំ និងសុំចាញ់ត្រឹមទឹកទី៤នោះ។
យ៉ាងណាក៏ដោយ ការទាត់ឲ្យ វ៉ាន់ វឿន ខូចដៃស្តាំ ក្នុងការប្រកួតផ្តាច់ព្រ័ត្រ ដណ្តើមខ្សែក្រវាត់មាស កាលពីថ្ងៃអាទិត្យ កន្លងមកនេះ វាបានក្លាយជារឿងនឹកស្មានមិនដល់ចំពោះ អេលីត ចំរើន ព្រោះ ចំរើន ខ្លួនឯង ក៏ស្ទើតែមិនចង់ជឿ ទៅលើអ្វីដែលបានកើតឡើងនោះដែរ។
សិស្សគណក្លិបប៉ែនកាក់គុនខ្មែរ អេលីត ចំរើន បាននិយាយក្រោយការប្រកួតថា៖«ខ្ញុំពិតជាមានអារម្មណ៍សប្បាយរីក និងរំភើបខ្លាំងបំផុត ព្រោះខ្ញុំមិននឹកស្មានថា អាចទាត់ដៃ វ៉ាន់ វឿន ឲ្យខូច និងរាប់ដល់១០អ៊ីចឹង ព្រោះការប្រកួត៣ទឹកដំបូង គាត់បានវាយសម្រុកលើខ្ញុំមែនទែន»។
អេលីត ចំរើន បានបញ្ជាក់ថា៖ «សម្រាប់ការប្រកួត៣ទឹកដំបូង ខ្ញុំមិនទាន់ដឹងថា អាចផ្តួលបាន ឬរកជ័យជម្នះបាននៅឡើយទេ ព្រោះគាត់ បានវាយសម្រុកមកខ្លាំង គ្រប់ស្នៀត និងលំបាកទប់ទល់។ ខ្ញុំគិតថា បើឈ្នះ គឺអាចត្រឹមពិន្ទុប៉ុណ្ណោះ ប៉ុន្តែស្នៀតទាត់របស់ខ្ញុំ ក្នុងទឹកទី៤ គឺចូលគោលដៅល្អណាស់ នាំឲ្យគាត់ខូចដៃតែម្តង»។
យ៉ាងណាក៏ដោយ វ៉ាន់ វឿន ដែលបានត្រឹម២ពាន់ដុល្លារ ចំពោះការចាញ់នៅវគ្គផ្តាច់ព្រ័ត្រនេះ បានចាត់ទុកការចាញ់របស់គេ វាបានកើតឡើងដោយការភ្លាត់ស្នៀត។ វ៉ាន រឿន បាននិយាយ ក្រោយការប្រកួតថា៖ «ការចាញ់នេះ គឺភ្លាត់ ដោយខូចដៃ ព្រោះការទាត់របស់គេធ្ងន់ណាស់»។
សិស្សគណក្លិបឃ្លាំងមឿនកីឡា វ៉ាន់ វឿន បានបន្ថែមថា៖«តាមរយៈពេលជាង៣ទឹក ខ្ញុំមានសង្ឃឹមឈ្នះពិន្ទុ ព្រោះខ្ញុំវាយចូលគោលដៅបានច្រើន ព្រមទាំងវាយសម្រុក ធ្វើឲ្យ អេលីត ចំរើន ថយជានិច្ច ហើយខ្ញុំគិតថា នៅទឹកទី៤ និងទី៥ ខ្ញុំកាន់តែមានប្រៀបផ្នែកកណ្តាប់ដៃ និងទាត់ជើងក្រោមថែមទៀត ប៉ុន្តែត្រូវបានគេទាត់ខូចដៃ ដ៏គួរសោកស្តាយបំផុត»៕