លោក Diego Maradona ដែលកាលពីមុនបានដឹកនាំក្លិប Dorados ក្នុងក្របខណ្ឌលីកទី២ របស់ម៉ិកស៊ិក ឥឡុវបានសម្រេចចិត្តលាលែងពីតំណែងជាអ្នកចាត់ការក្លឹប Gimnasia ក្រោយដឹកនាំក្លឹបនេះបានតែជាង ២ខែប៉ុណ្ណោះ។
Maradona ជាបុរសមានរហស្សនាមខ្លាកន្តឿដែលបានជួយអាហ្សង់ទីនលើកពាន World Cup កាលពីឆ្នាំ១៩៨៦ ធ្លាប់និយាយថា លោកបន្តនៅក្លឹបនេះ លុះណាតែសម្ព័ន្ធមិត្តរបស់លោក លោក Gabriel Pallegrino ដែលជាប្រធានក្លឹបជាប់ឆ្នោតជាប្រធានក្លឹបបន្ត។
យ៉ាងណាមិញ លោក Gabriel បានដកខ្លួនចេញពីការបោះឆ្នោតនៅក្នុងក្លឹប ក្រោយពេលមានភាពមិនសម្រុងគ្នាក្នុងលក្ខខ័ណ្ឌនៃការបោះឆ្នោត។ ការដកខ្លួនចេញពីការបោះឆ្នោតរបស់លោក Gabriel ធ្វើឲ្យ Maradona សម្រេចចាកចេញពីក្លឹបនេះ។
គួរបញ្ជាក់ផងដែរថា លោក Maradona បានដឹកនាំក្រុមបាល់ទាត់ចំនួន ៧កន្លែងហើយ ដោយក្នុងនោះ លោកក៏បានដឹកនាំក្រុមជម្រើសជាតិអាហ្សង់ទីន បានជាង ២ឆ្នាំផងដែរ៕
