អ្នកប្រដាល់ជើងខ្លាំងមកពីខេត្តបាត់ដំបង កែវ រំចង់ ប្រឹងហាត់ និងសម្រក់ខ្លាំងត្រឹម១ខែប៉ុណ្ណោះស្រក់សល់អស់១០គីឡូក្រាម ដើម្បីត្រៀមការប្រកួតមិត្តភាពអន្តរជាតិលើទឹកដីជប៉ុននាចុងខែធ្នូ ២០១៩ នេះ។
រំចង់ បានឲ្យដឹងថា សព្វថ្ងៃនេះទម្ងន់របស់ខ្លួននៅសល់ត្រឹម ៦៨គីឡូក្រាម ប៉ុណ្ណោះ ខណៈដែល១ខែមុនគឺមានទម្ងន់រហូតដល់៧៨គីឡូក្រាម។ ការហាត់សម្រក់នេះគឺធ្វើឡើងរយៈពេលត្រឹមមួយខែនោះទេ ប៉ុន្តែហ្វឹកហាត់តាមបច្ចេកទេស និងញុំអាហារបែបបំប៉នសុខភាព។
ការសម្រក់ទម្ងន់នេះគឺវាមិនពិបាកប៉ុន្មានទេសម្រាប់ខ្លួន ដោយសារតែអ្នកលេងគុនខ្មែររូបនេះមានក្រុមការងារ The Riel Team ចាំជួយជានិច្ច ដូចជាលោក Matias Andres Felix និង Miguel ដូច្នេះហើយការហាត់សម្រក់នេះគឺមិនប៉ះពាល់ដល់កម្លាំងនោះឡើយ ពោលស្រក់មែនតែកម្លាំងនៅធម្មតា។
រំលឹកដែរថា អ្នកលេងគុនខ្មែរចាស់វស្សារបស់កម្ពុជា កែវ រំចង់ នឹងត្រូវទៅប្រកួតមិត្តភាពអន្តរជាតិនៅឯប្រទេសជប៉ុន នាថ្ងៃទី២៩ ខែធ្នូ ២០១៩ នេះ ដោយប៉ះម្ចាស់ឈ្មោះ Yamagiwa Kazuki ក្នុងប្រភេទទម្ងន់ ៦៧គីឡូក្រាម៕
អត្ថបទ៖ នួន ស៊ីណា Credit Sabay
