អ្នកប្រដាល់មកពីខេត្តបាត់ដំបង ណាំ ម៉ូរ៉ាក់ ឈ្នះពិន្ទុដៃគូដោយប្រផឹតប្រផើយប៉ុណ្ណោះបានឱកាសឡើងទៅជុំទី២ នៃកម្មវិធីប្រកួតជម្រុះចាញ់ធ្លាក់ពានរង្វាន់ TV5 ទម្ងន់ ៦៣,៥គីឡូក្រាមកាលពីថ្ងៃសៅរ៍ ទី២៨ ធ្នូ ២០១៩។
ណាំ ម៉ូរ៉ាក់ វ៉ៃឆ្លាតតែម្ដង ព្យាយាមចូលវ៉ៃយកពិន្ទុម្ដងបន្តិចៗ ដោយមិនចាំបាច់ស្ទាបស្ទង់យូរនោះឡើយ។ ទឹកទី១ អ្នកប្រដាល់រូបនេះចេញកណ្ដាប់ដៃផង និងទាត់ផង ខណៈនៅពេលដៃគូវ៉ៃតបតវិញគឺឆាកចេញមិនឲ្យគេវ៉ៃត្រូវនោះឡើយ។
ការប្រកួតឈានដល់ទឹកទី២ អ្នកប្រដាល់ដើមកំណើតពីខេត្តបាត់ដំបងខាងលើនេះ ហាក់ចង់ប្ដូរកណ្ដាប់ដៃគ្នាជាមួយ មាស សារ៉ាក់ និងព្យាយាមវ៉ៃបែបប្រយោលជាជាងចាប់អោបដោយសារដឹងថាខ្លួនល្អដៃ។ ការប៉ះគ្នារវាង ណាំ ម៉ូរ៉ាក់ និង មាស សារ៉ាក់ គឺបន្តរហូតចប់ទឹកទី៣ ដោយលទ្ធផលចាញ់ឈ្នះគ្នាត្រឹមពិន្ទុប៉ុណ្ណោះ។
គូពានរង្វាន់ទី១ ណាំ ម៉ូរ៉ាក់ ឈ្នះពិន្ទុកីឡាករ មាស សារ៉ាក់ និងគូពានរង្វាន់ទី២ វេង សុភ័ក្រ ឈ្នះសន្លប់ទឹក១ លើកីឡាករ ភុន សោភ័ណ្ឌ។ ដូច្នេះ ណាំ ម៉ូរ៉ាក់ និង វេង សុភ័ត្រ ទាំងពីរនាក់នេះបានឡើងទៅជុំទី២ ពានរង្វាន់ TV5៕
អត្ថបទ៖ នួន ស៊ីណា Credit: Sabay
