ក្រុមព្រះខ័នរាជស្វាយរៀងនឹងត្រូវបើកទ្វារពហុកីឡដ្ឋានជាតិ ទទួលក្រុមជើងឯកលីគកំពូលឥណ្ឌូនេស៊ី Bali United នាវេលាម៉ោង ៦៖០០នាទីល្ងាចនេះក្នុងប្រកួតទី២ នៃពានរង្វាន់ AFC Cup 2020 ពូល G ហើយលោក Conor Nestor ក្រុមជើងឯកលីគកំពូលកម្ពុជារំពឹងការប្រកួតនេះ កូនក្រុមនឹងធ្វើបានល្អជាងការប្រកួតបើកឆាកជាមួយក្រុម Ceres Negros របស់ហ្វីលីពីន។
លោក Conor Nestor បានសម្ដែងការស្វាគមន៍ចំពោះវត្តមានក្រុម Bali United នៅកម្ពុជា ហើយលោកកំពុងទន្ទឹងរង់ចាំការប្រកួតល្ងាចនេះ តែលោករំពឹងថា រឿងរ៉ាវល្អៗនឹងកើតឡើងសម្រាប់ក្រុមខ្លួន បន្ទាប់ពីប្រកួតដំបូង ព្រះខ័នរាជស្វាយរៀងបានចាញ់ក្រុមម្ចាស់ផ្ទះ Ceres Negros ៤–០។ លើសពីនេះលោកសង្ឃឹមថា នឹងមានអ្នកគាំទ្រកម្ពុជាច្រើនចូលរួមទស្សនាការប្រកួតដ៏សំខាន់នេះ។
នេះបើតាមការបញ្ជាក់ក្នុងសន្និសីទសារព័ត៌មាន មុនការប្រកួតកាលពីម្សិលមិញ។ ចំណែកលោក Eko Purjianto ជំនួយការគ្រូបង្វឹកក្រុម Bali United វិញ បានទទួលស្គាល់ក្រុមព្រះខ័នរាជស្វាយរៀងគឺជាក្រុមល្អ ដ្បិតក្រុមលោក Conor ទើបដណ្ដើមបានជ័យជម្នះ ២ប្រកួតបើកឆាកលីគរដូវកាលថ្មី។
ដូច្នេះលោកជឿជាក់ថា ការប្រកួតល្ងាចនេះគឺជាការប្រកួតដ៏តានតឹង ព្រោះព្រះខ័នរាជស្វាយរៀងសម្បូរកីឡាករល្អៗច្រើន ទាំងកីឡាករក្នុងស្រុក និងកីឡាករបរទេស។ តែយ៉ាងណាក្រុមលោកនឹងព្យាយាមឲ្យអស់ពីលទ្ធភាព ដើម្បីដណ្ដើម ៣ពិន្ទុត្រឡប់ទៅផ្ទះវិញ។
គួរបញ្ជាក់ថា ក្រុមព្រះខ័នរាជស្វាយរៀង និងក្រុម Bali United គឺស្ថិតក្នុងពូល G ជាមួយក្រុម Ceres Negros របស់ហ្វីលីពីន និងក្រុម Than Guang Ninh របស់វៀតណាម។
បច្ចុប្បន្នព្រះខ័នរាជស្វាយរៀងកំពុងឈរបាតតារាង តែមិនទាន់មានពិន្ទុរាប់នោះទេ ផ្ទុយពីក្រុម Bali United ដែលបានយកឈ្នះក្រុមវៀតណាម Than GuangNinh ៤–១ កាលពីពេលថ្មីៗកន្លងទៅ។ ចំពោះការប្រកួតល្ងាចនេះក៏នឹងមានការផ្សាយផ្ទាល់ ពីក្រុមការងារទូរទស្សន៍ BTV-News ផងដែរ៕
អត្ថបទ៖ លី ឈុនឡា
