ខ្សែប្រយុទ្ធ Lionel Messi បានរកគ្រាប់បាល់ទី៧០០ក្នុងអាជីពរបស់គេ ប៉ុន្តែ ក្រុម Barcelona បានជួបការខកចិត្តមួយផ្សេងទៀត ក្នុងការប្រជែងដណ្តើមពានក្របខ័ណ្ឌ La Liga របស់ពួកគេ ក្រោយពីបានបញ្ចប់ក្នុងលទ្ធផលស្មើ ២-២ ជាមួយនឹងក្រុម Atletico Madrid កាលពីថ្ងៃអង្គារ។
Messi បានស៊ុតបាល់ប៉េណាល់ទី១គ្រាប់ ដើម្បីបង្កើតកំណត់ត្រាផ្ទាល់ខ្លួនមួយផ្សេងទៀត នៅកីឡដ្ឋាន Camp Nou ប៉ុន្តែ ក្រុម Atletico បានវាយ២គ្រាប់វិញ តាមរយៈការស៊ុតបាល់ប៉េណាល់ទាំង២គ្រាប់ ដោយខ្សែបម្រើ Saul Niguez បានស៊ុតបាល់បញ្ចូលទីទាំង២លើកនោះ ក្រោយពីក្រុម Barca រកបានគ្រាប់បាល់នាំមុខមុន តាមរយៈការធ្វើឲ្យបាល់ចូលទីខ្លួនឯងរបស់ Diego Costa។
លទ្ធផលនេះ ធ្វើឲ្យក្រុម Real Madrid មានឱកាសក្នុងការនាំមុខ៤ពិន្ទុដាច់លើកំពូលតារាង ប្រសិនបើពួកគេអាចយកឈ្នះលើក្រុម Getafe នៅលើទឹកដីខ្លួនឯង នៅរាត្រីនេះ ដែលនោះគឺជាការនាំមុខដ៏ច្រើន ខណៈដែលនៅសល់ការប្រកួតត្រឹមតែ៥លើកទៀតប៉ុណ្ណោះ។ ជាមួយនឹងការដណ្តើមបានលទ្ធផលល្អជាងពីជំនួបរវាងក្រុមទាំង២ វាហាក់ដូចជាមានភាគរយតិចតួចណាស់ដែលក្រុម Real Madrid មិនឈ្នះពាន ប៉ុន្តែ ក៏មិនធានាថា ក្រុម Barcelona បង្ហាញពីភាពខ្លាំងគ្រប់គ្រាន់ដើម្បីដាក់សម្ពាធនោះឡើយ។
នេះគឺជាការទទួលបានលទ្ធផលស្មើជាលើកទី៣ ក្នុងចំណោមការប្រកួត៤លើក ហើយស្របពេលដែលមានការលើកឡើងពីការមិនចុះសម្រុងនឹងគ្នារវាងកីឡាករ និងគ្រូបង្វឹក អនាគតរបស់លោក Quique Setien ក៏ហាក់ស្ថិតក្នុងភាពមិនច្បាស់ផងដែរ៕
ប្រភពព័ត៌មាន៖ Channel News Asia