អ្នកចាំទី Hugo Lloris បានបង្កើតឲ្យសន្តិភាពវិញហើយជាមួយនឹងខ្សែប្រយុទ្ធ Son Heung-min ក្រោយពីតារាឆ្នើមរបស់ក្លិប Tottenham ទាំង២ បានឈ្លោះប្រកែកគ្នាយ៉ាងខឹងសម្បារ អំឡុងពេលក្រុមខ្លួនទទួលបានជ័យជម្នះក្នុងលទ្ធផល ១-០ លើក្រុម Everton កាលពីថ្ងៃចន្ទ។
ស្របពេលដែល Son បានដើរទៅកាន់ច្រកទ្វារទៅកាន់បន្ទប់ផ្លាស់ប្តូរសម្លៀកបំពាក់ នៅពាក់កណ្តាលតង់ អ្នកចាំទីអន្តរជាតិបារាំង Lloris បានប៉ះទង្គិចជាមួយនឹងតារាឆ្នើមអន្តរជាតិកូរ៉េខាងត្បូងរូបនេះ ដោយបានស្រែកដាក់រូបគេ និងរុញស្មាររបស់គេ។
Son បានបញ្ចេញប្រតិកម្មវិញយ៉ាងខឹងសម្បារ ហើយកីឡាករទាំង២ ត្រូវបានព្យាយាមបំបែកចេញពីគ្នាដោយមិត្តរួមក្រុម Harry Winks និង Moussa Sissoko ដោយសារតែបារម្ភខ្លាចមានជម្លោះកាន់តែធំ។
Lloris បានផ្ទុះកំហឹងដោយសារតែ Son មិនអាចគ្រប់គ្រងបាល់បាន នៅតំបន់កណ្តាល នៅមុនពេល ខ្សែប្រយុទ្ធ Richarlison របស់ក្លិប Everton បានដាក់សម្ពាធទៅលើតំបន់គ្រោះថ្នាក់។ Lloris បានឲ្យដឹងថា៖ «ខ្ញុំគិតថា យើងរបូតឱកាស២ ទៅ៣លើក នៅមុនពេលតង់ទី១ ដោយសារតែយើងមិនបានដាក់សម្ពាធ ដែលធ្វើឲ្យខ្ញុំខឹង។
ប៉ុន្តែ នេះហើយគឺជាបាល់ទាត់។ ស្របពេលជាមួយគ្នានេះ លោក Jose Mourinho ដែលជាអ្នកចាត់ការទូទៅ បានព្យាយាមបង្កើតសន្តិភាពរវាងកីឡាករទាំង២ ដោយមិនដាក់ការស្តីបន្ទោសលើកីឡាកររូបណាឡើយ៕
ប្រភពព័ត៌មាន៖ Channel News Asia