កីឡាករជើងខ្លាំងវ័យជំនាន់ក្រោយ ប៊ុន សុធា បានបង្ហាញការសោកស្តាយ ខណៈរូបគេមិនអាចផ្តួល អេ ណារ័ត្ន ឲ្យសន្លប់ ដើម្បីក្រសោបយកទឹកប្រាក់សរុបចំនួន៥លានរៀល ពីការប្រកួតម៉ារ៉ាតុងដណ្តើមប្រាក់លាន ទម្ងន់៥៧គីឡូក្រាម នៃកម្មវិធី Mas Fight Cambodia នៅលើសង្វៀនថោន បាននោះ។
យ៉ាងណាក៏ដោយ ការបញ្ចប់ត្រឹមលទ្ធផលស្មើគ្នា ទៅតាមច្បាប់ Mas Fight ក្នុងការប្រកួតចំនួន៩នាទីពេញ នៅវគ្គផ្តាច់ព្រ័ត្រ កាលពីថ្ងៃអាទិត្យ ម្សិលមិញនេះ ត្រូវបាន ប៊ុន សុធា អះអាងថា មកពីរូបគេមានស្នាមបែក នៅពេលប្រកួតជាមួយ ម៉ន សាម៉េត នៅក្នុងវគ្គជម្រុះ៣ទឹក ហើយស្នាមរបួសនោះ បានរំខាន់ដល់ការប្រកួតផ្តាច់ព្រ័ត្ររបស់គេជាមួយ អេ ណារ័ត្ន ព្រោះនៅពេល អេ ណារ័ត្ន វាយចំរបួសចាស់នោះ នាំឲ្យមានការហូរឈាមស្រោចពេញផ្ទៃមុខ ប៊ុន សុធា តែម្តង។
កីឡាករនិយមវាយសម្រុក ប៊ុន សុធា បាននិយាយក្រោយការប្រកួតថា៖«បើខ្ញុំអត់មានស្នាមបែក ប្រហែលខ្ញុំវាយបានល្អជាងហ្នឹង ហើយខ្ញុំគិតថា អាចវាយគាត់ឲ្យសន្លប់ ប៉ុន្តែនៅពេលខ្ញុំបែកបែបនេះ ខ្ញុំញញើតនឹងស្នាមបែកនេះដែរ ព្រោះពេលឈាមហូរចូលភ្នែកច្រើនពេក ខ្ញុំខ្លាចចូលកណ្តាប់ដៃរបស់គាត់»។
សម្រាប់ការប្រកួតម៉ារ៉ាតុង ដណ្តើមប្រាក់លាន កាលពីថ្ងៃអាទិត្យ ម្សិលមិញនេះ ប៊ុន សុធា បានយកឈ្នះកីឡាករជើងចាស់ ម៉ន សាម៉េត ដោយពិន្ទុ ប៉ុន្តែនៅក្នុងការប្រកួតត្រឹម៣ទឹកនោះ សាម៉េត បានវាយកែងបណ្តាលឲ្យបែក នៅលើផ្ទៃមុខ ប៊ុន សុធា យ៉ាងធំ។ ចំណែក អេ ណារ័ត្ន បានយកឈ្នះដោយពិន្ទុលើ សៅ ប៊ុនធឿន។
យ៉ាងណាក៏ដោយ សម្រាប់ការប្រកួតផ្តាច់ព្រ័ត្ររវាង ប៊ុន សុធា និង អេ ណារ័ត្ន នៅវគ្គផ្តាច់ព្រ័ត្រនោះ ពិតជាមានការស្វិតស្វាញខ្លាំង ព្រោះពួកគេបានប្រឹងប្រែងវាយប្តូរគ្នាទាំងមានរបួសនៅលើផ្ទៃមុខដូចគ្មា ប៉ុន្តែការមិនអាចផ្តួលគ្នាឲ្យសន្លប់ តាមច្បាប់ Mas Fight នោះ គឺអ្នកទាំង២ ត្រូវបានកំណត់ឲ្យស្មើគ្នា នឹងទទួលបានប្រាក់រង្វាន់ម្នាក់១,៨លានរៀល ព្រមទាំងប្រាក់រង្វាន់លើកទឹកចិត្តម្នាក់២០ម៉ឺនរៀលទៀតដូចគ្នា អ៊ីចឹងសម្រាប់ការប្រកួតនេះ អេ ណារ័ត្ន និង ប៊ុន សុធា មានម្នាក់២លានរៀលដូចគ្នា៕