អង់គ្លេស៖ ក្លិប Brighton បានបំពេញការនាំយក Adam Lallana អតីតខ្សែបម្រើរបស់ក្លិប Liverpool ដោយគ្មានតម្លៃខ្លួន កាលពីថ្ងៃចន្ទ។ Lallana ដែលជាអតីតខ្សែបម្រើអន្តរជាតិអង់គ្លេស បានយល់ព្រមចុះកិច្ចសន្យារយៈពេល៣ឆ្នាំ ជាមួយនឹងក្លិប Brighton ពោលគឺត្រឹមតែរយៈពេល៤ម៉ោងប៉ុណ្ណោះ បន្ទាប់ពីបញ្ចប់រដូវកាលនៃក្របខ័ណ្ឌ Premier League។
កីឡាករវ័យ៣២ឆ្នាំរូបនេះ ដែលកិច្ចសន្យារបស់គេជាមួយនឹងក្លិប Liverpool បានផុតកំណត់ បន្ទាប់ពីការប្រកួតចុងក្រោយកាលពីថ្ងៃអាទិត្យនោះ គឺជាគោលដៅរបស់ក្លិប Everton, Leicester និង Burnley នៅមុនពេលរូបគេបានសម្រេចចិត្តចូលរួមជាមួយនឹងក្រុមរបស់លោក Graham Potter។ លោក Potter បានប្រាប់គេហទំព័ររបស់ក្លិប Brighton ថា៖ «Adam គឺជាកីឡាការចំណូលថ្មីដ៏ឆ្នើមម្នាក់សម្រាប់យើង និងជាអ្នកដែលខ្ញុំប្រាកដចិត្តថា អ្នកគាំទ្រនឹងពិតជាទន្ទឹងរង់ចាំក្នុងការឃើញរូបគេលេង នៅពេលដែលអ្វីៗវិលទៅរកភាពធម្មតាវិញ»។ លោកបានបន្ថែមទៀតថា៖ «ការដែលមានទាំងបទពិសោធ និងគុណភាពលេងនៅលើទីលាន នឹងក្លាយជាការបន្ថែមដ៏អស្ចារ្យមួយសម្រាប់យើង ហើយខ្ញុំដឹងថា រូបគេមានគំរូដ៏អស្ចារ្យ សម្រាប់កីឡាករវ័យក្មេងក្នុងក្រុមនេះ»។
អំឡុងពេលរូបគេលេងឲ្យក្លិប Liverpool កីឡាករ Lallana បានឈ្នះពានក្របខ័ណ្ឌ Champions League, Premier League, European Super Cup និងពាន FIFA Club World Cup៕
ប្រភពព័ត៌មាន៖ Channel News Asia