បរទេស៖ ក្លិបតោខៀវ Chelsea កំពុងតែស្ថិតលើផ្លូវឆ្ពោះទៅកាន់ការបំពេញការផ្ទេរខ្សែការពារអន្តរជាតិអេស្ប៉ាញ Marc Cucurella ពីក្លិប Brighton។ ខ្សែការពារវ័យ២៤ឆ្នាំរូបនេះ បានដាក់សំណើសុំការផ្ទេរ ហើយទទួលបានការចាប់អារម្មណ៍ពីក្លិប Manchester City ប៉ុន្តែ ពួកគេមិនបានព្យាយាមនាំឲ្យមានការផ្ទេរមួយឡើយ និងបានគិតថា តម្លៃខ្លួនរបស់ខ្សែការពាររូបនេះ ខ្ពស់ពេក។
ប្រភពនៅក្លិប Chelsea ជឿជាក់ថា នឹងបំពេញការផ្ទេរនេះ ប៉ុន្តែ ក្លិប Brighton បានបញ្ជាក់ថា ការព្រមព្រៀងគ្នាមួយមិនទាន់ឈានដល់ជាមួយនឹងក្លិបណាមួយឡើយ។ តម្លៃខ្លួននៃការផ្ទេរ Cucurella មានចំនួន៥២,៥លានផោន (ស្មើនឹង៦៤លានដុល្លារអាមេរិក) ខណៈដែលខ្សែការពារកណ្តាលវ័យ១៩ឆ្នាំ Levi Colwill អាចនឹងត្រូវផ្ទេរទៅកាន់ក្លិប Brighton វិញ ជាថ្នូរនឹងការដោះដូរ។ Cucurella បានយល់ព្រមលើលក្ខខណ្ឌផ្ទាល់ខ្លួនរួចជាស្រេច ហើយការចូលរួមរបស់ខ្សែការពារសញ្ជតិអេស្ប៉ាញរូបនេះ នឹងជួយពង្រឹងដល់ក្រុមរបស់លោក Thomas Tuchel ស្របពេលដែលលោកកំពុងតែសម្លឹងរកធ្វើការពង្រឹងនៅតំបន់ការពាររបស់ Chelsea។
ប៉ុន្តែ ទោះបីជាយ៉ាងណា Brighton ដែលទំនងដូចជាត្រូវទទួលបរាជ័យក្នុងការប្រមាញ់ទិញខ្សែការពារស្លាបឆ្វេង Sergio Reguilón ពីក្លិប Tottenham និង Zaidu Sanusi របស់ក្លិប Porto បានបញ្ជាក់ប្រាប់ថា វានឹងមិនងាយស្រួលឡើយសម្រាប់លោក Tuchel ក្នុងការនាំយកអតីតខ្សែការពាររបស់ក្លិប Getafe រូបនេះនោះ៕
ប្រភពព័ត៌មាន៖ BBC