ប្រទេសបារាំង៖ ក្រុម Paris Saint-Germain អាចនឹងបញ្ចប់រដូវកាលជាមួយនឹងការឈ្នះពាន៣ម្តងទៀត នៅរាត្រីនេះ នៅពេលដែលពួកគេប៉ះជាមួយនឹងក្រុម Lyon ក្នុងវគ្គផ្តាច់ព្រ័ត្រនៃពាន French League Cupប៉ុន្តែ ការត្រៀមលក្ខខណៈរបស់ពួកគេសម្រាប់ការប្រកួតនេះ ត្រូវបានរំខានដោយសារតែបញ្ហារបួសកជើងរបស់ខ្សែប្រយុទ្ធ Kylian Mbappe។
តារាឆ្នើមក្នុងព្រឹត្តិការណ៍ World Cup រូបនេះ បានជួបបញ្ហាក្នុងការប្រកួតពាន French Cup វគ្គផ្តាច់ព្រ័ត្រ ជាមួយនឹងក្រុម Saint-Etienne កាលពីថ្ងៃសុក្រ សប្តាហ៍មុន ក្នុងការប្រកួតផ្លូវការជាលើកដំបូង នៅលើទឹកដីបារាំង បើគិតចាប់តាំងពីការផ្អាកការប្រកួតដោយសារតែវីរុសកូរ៉ូណា ក្នុងខែមីនា។ Mbappe ត្រូវបានប្តូរចេញដោយសារតែរបយសកជើងស្តាំ ក្រោយពីការប្រជែងដណ្តើមបាល់ដ៏គ្រោះថ្នាក់ពីកីឡាករ Loic Perrin របស់ក្រុម Saint-Etienne ហើយរូបគេទំនងជាត្រូវអវត្តមានក្នុងការប្រកួតនេះ ដែលពិតជាសំខាន់សម្រាប់ PSGដោយពួកគេក៏ត្រូវប្រកួតក្នុងក្របខ័ណ្ឌ Champions League ជាមួយនឹងក្រុម Atalanta នៅថ្ងៃទី១២ ខែសីហា ផងដែរ។
កាលពីថ្ងៃព្រហស្បតិ៍ លោក Thomas Tuchel គ្រូបង្វឹករបស់ក្រុម PSG បានទទួលស្គាល់ថា វានឹងក្លាយជារឿងអព្ភូតហេតុមួយ សម្រាប់កីឡាករវ័យ២១ឆ្នាំរូបនេះ ក្នុងការជះសះស្បើយទាន់ពេលវេលាសម្រាប់ការប្រកួតនៅទីក្រុង Lisbon។ ខ្សែប្រយុទ្ធ Angel Di Maria នឹងត្រូវអវត្តមានរួចជាស្រេចក្នុងាករប្រកួតនេះ ដោយសារតែការជាប់ពិន័យព្យួរ ហើយនៅពេលដែលត្រូវបានចោទសួរថា មានក្តីសង្ឃឹមចំពោះ Mbappe ឬអត់ លោក Tuchel បានឲ្យដឹងថា៖ «ពិតណាស់ យើងតែងតែសង្ឃឹម ប៉ុន្តែ វានឹងលំបាកបន្តិចហើយ។ យើងរង់ចាំយ៉ាងអន្ទះសារចំពោះរឿងអព្ភូតហេតុ»៕
ប្រភពព័ត៌មាន៖ Channel News Asia