ប្រទេសអុីតាលី៖ លោក Maurizio Sarri គ្រូបង្វឹករបស់ក្រុម Juventus បានច្រានចោលចំពោះការលើកឡើងថា អនាគតរបស់លោកនឹងអាស្រ័យទៅលើលទ្ធផលពីការប្រកួតក្របខ័ណ្ឌ Champions League វគ្គ១៦ក្រុមចុងក្រោយ ជើងទី២ ជាមួយនឹងក្រុម Lyon នៅទីក្រុង Turin នៅរាត្រីនេះឡើយ។ Juventus កំពុងតែដេញតាមពីក្រោយក្រុមរបស់ក្របខ័ណ្ឌ Ligue 1 មួយនេះ ក្រោយពីបានរងបរាជ័យ ១-០ នៅប្រទេសបារាំង កាលពី៦ខែមុន នៅមុនពេលការប្រកួតត្រូវបានផ្អាកដោយសារតែវីរុសកូរ៉ូណា។
ស្របពេលដែល Juventus សម្លឹងរកការរក្សាក្តីសង្ឃឹមរបស់ខ្លួនក្នុងការប្រជែងពានអឺរ៉ុប ជាលើកដំបូងគេ បើគិតចាប់តាំងពីឆ្នាំ១៩៩៦ លោក Sarri បានឲ្យដឹងថា៖ «ខ្ញុំគិតថា អនាគតរបស់ខ្ញុំមិនអាស្រ័យទៅលើការប្រកួតនេះឡើយ។ ការគិតបែបនេះ ធ្វើឲ្យប្រធានក្លិបហាក់ដូចជាអ្នកធ្វើការកម្រិតស្ម័គ្រចិត្តអ៊ីចឹង»។ លោកបានប្រាប់បន្តថា៖ «ខ្ញុំគិតថា ខ្ញុំកំពុងតែដោះស្រាយយ៉ាងល្អជាមួយនឹងប្រធានដឹកនាំកម្រិតខ្ពស់។ ពួកគេនឹងសម្រេចថា តើនឹងបន្ត ឬក៏ផ្លាស់ប្តូរ។ ប៉ុន្តែ វាមិនអាស្រ័យទៅលើការប្រកួតតែមួយឡើយ»។
Juventus បានឈ្នះពានក្របខ័ណ្ឌលីកជាលើកទី៩ជាប់ៗគ្នា ប៉ុន្តែ បានធ្លាក់ចុះទម្រង់លេង ក្រោយពីការព្យួរដោយសារតែវីរុសកូរ៉ូណា តាមរយៈការឈ្នះត្រឹមតែ២លើកគត់ ក្នុងចំណោមការប្រកួត៨លើកចុងក្រោយរបស់ពួកគេ។ លោក Sarri បានបន្ថែមទៀតថា៖ «យើងពិតជារីករាយណាស់ក្នុងការឈ្នះពានដ៏លំបាកបំផុត Serie A ក្នុងប្រវត្តិសាស្ត្រ»៕
ប្រភពព័ត៌មាន៖ Channel News Asia