បរទេស៖ ខ្សែប្រយុទ្ធដ៏មានឥទ្ធិពល Kylian Mbappe ទំនងនឹងចូលលេងឲ្យក្រុម Paris Saint–Germainក្នុងការប្រកួតក្របខ័ណ្ឌ Champions League វគ្គ៨ក្រុមចុងក្រោយរបស់ពួកគេជាមួយនឹងក្រុម Atalanta ក្នុងទីក្រុង Lisbon នៅរាត្រីនេះ ក្រោយពីជាសះស្បើយពីរបួសកជើងរបស់គេ។
នេះបើយោងទៅតាមការបញ្ជាក់របស់លោកគ្រូបង្វឹក Thomas Tuchel នៅមុនការប្រកួត១ថ្ងៃ។ លោក Tuchel បានប្រាប់អ្នកយកព័ត៌មានថា៖ «ប្រសិនបើរូបគេហ្វឹកហាត់នៅល្ងាចថ្ងៃអង្គារ និងគ្មានបញ្ហាបន្ថែមកើតឡើង រូបគេនឹងស្ថិតក្នុងក្រុមនេះនៅរាត្រីថ្ងៃពុធ»។ ប៉ុន្តែ ទោះបីជាយ៉ាងណា លោក Tuchel បានបញ្ជាក់បន្តថា Mbappe អាចនឹងស្ថិតជាកីឡាករបម្រុង ក្នុងពេលប្រកួតជាមួយនឹងក្រុមរបស់អ៊ីតាលី។ គ្រូបង្វឹករូបនេះបានឲ្យដឹងថា៖ «យើងពិតជារីករាយណាស់ក្នុងការអាចមានឱកាសក្នុងការបញ្ចប់ការប្រកួតនេះ ជាមួយនឹង Kylian នៅលើទីលាន ពីព្រោះរូបគេនឹងផ្តល់ជំនួយដ៏ធំដល់ Neymar ដែលចូលចិត្តលេងដៃគូជាមួយនឹងរូបគេ»។
Mbappe ត្រូវបង្ខំឲ្យធ្វើការខិតខំព្យាយាមយ៉ាងខ្លាំង ដើម្បីព្យាយាមទទួលបានភាពរឹងមាំឲ្យទាន់ពេលវេលា សម្រាប់ការប្រកួតវគ្គ៨ក្រុមចុងក្រោយ ក្រោយពីរងរបួសកជើង ក្នុងពេលក្រុម PSG បានឈ្នះពាន FrenchCup តាមរយៈការផ្តួលក្រុម Saint–Etienne កាលពីថ្ងៃទី២៤ ខែកក្កដា៕
ប្រភពព័ត៌មាន៖ Channel News Asia
