បរទេស៖ ខ្សែបម្រើ Leon Goretzka របស់ក្លិប Bayern Munich បានបញ្ជាក់ថា ក្លិបយក្សរបស់អាល្លឺម៉ង់មួយនេះ កំពុងតែរៀបចំផែនការដើម្បីទប់ស្កាត់តារាឆ្នើម Lionel Messi របស់ក្លិប Barcelona នៅមុនពេលការប្រកួតក្របខ័ណ្ឌ Champions League វគ្គ៨ក្រុមចុងក្រោយ នៅរាត្រីថ្ងៃសុក្រ។
នៅពេលដែលត្រូវបានចោទសួរពីរបៀបក្នុងការទប់ស្កាត់ Messi Goretzka បានឆ្លើយកាលពីថ្ងៃអង្គារក្នុងទីក្រុង Lisbon ថា៖ «មនុស្សរាប់ម៉ឺននាក់ នៅមុនខ្ញុំ បានព្យាយាមឆ្លើយសំណួរនេះ»។ កីឡាកររូបនេះបានប្រាប់បន្តថា៖ «នេះគឺជាសំណួរដ៏ល្អ ក្នុងការលេងជាមួយនឹងកីឡាករដ៏ឆ្នើមម្នាក់ទៀតប្រចាំ១ទសវត្សរ៍ចុងក្រោយនេះ ក្រោយពីបានប្រកួតជាមួយនឹងខ្សែប្រយុទ្ធ Cristiano Ronaldo របស់ក្លិប Juventus ២ ទៅ៣លើក»។ ទាក់ទងនឹង Messi ខ្សែបម្រើ Goretzka វ័យ២៥ឆ្នាំ បានបញ្ជាក់ថា៖ «បញ្ហានោះអាចដោះស្រាយបានដោយការធ្វើការងារជាក្រុម ពីព្រោះរូបគេជាកីឡាករបាល់ទាត់ដ៏ឆ្នើម»។
Messi បានរកគ្រាប់បាល់ទី៣១របស់គេក្នុងរដូវកាលនេះ កាលពីថ្ងៃសៅរ៍ និងកំពុងតែសម្លឹងរកការឈ្នះពាន Champions League ជាលើកទី៥ ក្នុងអាជីពរបស់គេជាមួយនឹងក្លិប Barcelona។ ប៉ុន្តែ ទោះបីជាយ៉ាងណា ក្រុមកំពុងតែប្រមាញ់ពានបី Bayern បានឈ្នះរាល់ការប្រកួតទាំង១៣លើករសប់ខ្លួន បើគិតចាប់តាំងពីចាប់ផ្តើមរដូវកាលឡើងវិញពីការផ្អាកអស់រយៈពេលដ៏យូរ។ ពួកគេបានបង្ហាញពីទម្រង់លេងដ៏គួរឲ្យចាប់អារម្មណ៍របស់ខ្លួន កាលពីថ្ងៃសៅរ៍ នៅពេលដែលខ្សែប្រយុទ្ធ Robert Lewandowsk ដែលជាអ្នករកបានគ្រាប់បាល់ច្រើនជាងគេក្នុង Champions League បានស៊ុតបាល់បញ្ចូលទី២គ្រាប់ និងជួយឲ្យមិត្តរួមក្រុមរកបាន២គ្រាប់ផ្សេងទៀត ក្នុងពេលផ្តួល Chelsea ៤-១ ក្នុងការប្រកួតជើងទី២ នៃវគ្គ១៦ក្រុមចុងក្រោយ៕
ប្រភពព័ត៌មាន៖ Channel News Asia
