អ្នកចាត់ការទៅទៅក្រុមបឹងកេត លោក បែ មករា បានអះអាងថា ការប្រកួតប្រជែង ដើម្បីរក្សាទីតាំងកំពូលតារាងនៃលីកកំពូលកម្ពុជា ឆ្នាំ២០២០ របស់ក្រុមលោក នឹងកាន់តែមានភាពស្វិតស្វាញខ្លាំង សម្រាប់ការប្រកួតនៅជើងទី២ ព្រោះលោកមើលឃើញថា គ្រប់ក្រុមទាំងអស់ ដែលកំពុងឈរនៅក្នុងតំបន់Top6 សុទ្ធតែនៅមានឱកាសប្រជែងយកតំណែងជើងឯក ឬពានដូចគ្នា។
លោក បែ មករា បាននិយាយថា៖ «ការបញ្ចប់ជើងទី១ ក្រុមរបស់យើងធ្វើបានល្អ ដោយទទួលបានលេខ១ ប៉ុន្តែខ្ញុំជឿជាក់ថា សម្រាប់ជើងទី២ យើងនឹងមានការប្រកួតប្រជែងកាន់តែខ្លាំង ព្រោះសុទ្ធតែជាក្រុមកំពូលៗ ហើយគ្រប់ក្រុមទាំងអស់ នៅមានឱកាសដណ្តើមយកជើងឯក អ៊ីចឹងខ្ញុំគិតថា នៅជើងទី២នេះ មានការប្រកួតស្វិតស្វាញ និងតឹងតែងជាងជើងទី១ទៅទៀត»។
គួររំឭកថា ក្រុមបឹងកេត ទើបតែដណ្តើមបានទីតាំងកំពូលតារាង ពីក្រុមម្ចាស់ជើងឯក ព្រះខ័នរាជស្វាយរៀង បន្ទាប់ពីពួកគេ បានយកឈ្នះក្រុមម្ចាស់ផ្ទះ ស្វាយរៀង ៤-២ ក្នុងការប្រកួតបញ្ចប់ជើងទី១ នៃលីកកំពូលកម្ពុជា ឆ្នាំ២០២០ កាលពីថ្ងៃអាទិត្យ ហើយនៅក្នុងចំណោមក្រុមទាំង៦ ឈរនៅ Top6 ដែលមានសិទ្ធិប្រកួតប្រជែងយកពាន នៅជើងទី២នេះ គឺបឹងកេត និងក្រុមស្វាយរៀង មានប្រៀបជាងគេ ដោយសារពេលនេះ បឹងកេត មាន៣២ពិន្ទុ ខណៈ ស្វាយរៀង មាន៣១ពិន្ទុ។
ចំណែកក្រុមលេខ៣ វិសាខា និងក្រុមលេខ៤ កងយោធពលខេមរភូមិន្ទ (ទ័ព) មានត្រឹម២៣ពិន្ទុស្មើគ្នា ហើយក្រុមលេខ៥ ភ្នំពេញក្រោន និងក្រុមលេខ៦ ណាហ្គាវើល មាន២២ពិន្ទុដូចគ្នា គឺមានន័យថា ក្រុមទាំង៤នេះ មានគន្លាតពិន្ទុពីក្រុមបឹងកេត និងស្វាយរៀង ចន្លោះពី៩ទៅ១០ពិន្ទុឯណោះ ខណៈការប្រកួតជុំទី២ រវាងក្រុមឈរនៅ Top6 នេះ មានត្រឹម៥លើកប៉ុណ្ណោះ អ៊ីចឹងមានន័យថា បើក្នុងចំណោម៥ប្រកួតដូចគ្នានេះ បឹងកេត និងស្វាយរៀង ឈ្នះតែ២ប្រកួតទៀត គឺទាំងវិសាខា ទ័ព ភ្នំពេញក្រោន និងណាហ្គាវើល លែងមានឱកាសប្រជែងយកពានហើយ គឺម្ចាស់ពាន មានតែ បឹងកេត ឬ ស្វាយរៀង ប៉ុណ្ណោះ។
យ៉ាងណាក៏ដោយ លោក បែ មករា នៅតែគិតថា ក្រុមទាំង៤ខាងលើ នៅតែមានឱកាសប្រជែងយកពាន។ លោកបានបញ្ជាក់ថា៖ «ចំពោះស្ថានភាពប្រជែងជើងឯកនេះ ខ្ញុំនៅតែចាត់ទុកថា ឱកាសដណ្តើមរបស់គ្រប់ក្រុមនៅតែមាន ទោះក្រុមខ្លះ នៅមានតិចក៏ដោយ ព្រោះខ្ញុំជឿថា នឹងមានការប្រឹងប្រែងខ្លាំង។ ទោះបីជា ក្រុមបឹងកេត និងក្រុមស្វាយរៀង មានប្រៀបបន្តិច ព្រោះមានពិន្ទុលើគេក៏ដោយ ប៉ុន្តែវាមិនអស់សង្ឃឹមច្រើន សម្រាប់ក្រុម ដែលមកដណ្តើមជើងឯកនោះទេ»៕
