ក្លិបបាល់ទាត់បឹងកេត បានប្រកាសបញ្ចប់កិច្ចសន្យាខ្ចីជើងខ្សែប្រយុទ្ធរបស់កាមេរូន Abee Ndjoo ជាផ្លូវការហើយ ដើម្បីបើកផ្លូវក្នុងការយកកីឡាករបរទេសមានសមត្ថភាពម្នាក់ទៀត មកជួយដល់ក្រុម សម្រាប់ត្រៀមការប្រកួតលីគកំពូលកម្ពុជា រដូវកាលថ្មី ឆ្នាំ២០២២នេះ ដែលបឹងកេត បានដាក់គោលដៅដណ្តើមឱ្យបានពាន ដើម្បីស្តារមុខមាត់ត្រឡប់មកវិញ។
«សូមអរគុណដល់ Abee Adjoo សម្រាប់ពេលវេលារបស់អ្នក ដែលបាននៅជាមួយពួកយើង។ សូមជូនពរឱ្យអ្នក មានសំណាងល្អ និងទទួលបានភាពប្រសើរ និងជោគជ័យគ្រប់យ៉ាង»។ នេះជាការប្រកាសព័ត៌មានរបស់ក្លិបបឹងកេត នៅលើផេចហ្វេសប៊ុកផ្លូវការរបស់ខ្លួន កាលពីថ្ងៃអង្គារ ដើម្បីបញ្ជាក់ពីការបញ្ចប់កិច្ចសន្យាខ្ចីជើងរបស់ខ្សែប្រយុទ្ធរូបនេះ ដែលបឹងកេត បានផ្ទេរ ឬខ្ចីជើងពីក្លិបអាស៊ីអឺរ៉ុប នៅពាក់កណ្តាលរដូវកាល ឆ្នាំ២០២១។
តាមរយៈការបញ្ចប់ការខ្ចីជើងនេះ បឹងកេត នឹងអាចនាំយកកីឡាករបរទេសចំណូលថ្មីម្នាក់ទៀត ដើម្បីជួយដល់ក្រុម សម្រាប់ការប្រកួតលីគកំពូលកម្ពុជា ឆ្នាំ២០២២នេះ គឺបន្ថែមទៅលើកីឡាករបរទេស៤នាក់ រួមមានខ្សែបម្រើជនជាតិប្រេស៊ីល Alexandra Cardoso ខ្សែការពារ អ៊ីរ៉ង់ Taher Jahanbakksh ខ្សែបម្រើអាហ្គានីស្ថាន Zazai Mustafa និងខ្សែប្រយុទ្ធឆ្នើមរបស់នីហ្សេរីយ៉ា Ajayi Opeyemi ដែលអ្នកទាំង៤នេះ បឹងកេត បានចុះកុងត្រារួចរាល់ហើយ សម្រាប់ត្រៀមការប្រកួតរដូវកាលថ្មីនេះ។
ជាមួយគ្នានេះ បឹងកេត បានដាក់គោលដៅរួចទៅហើយថា ត្រូវដណ្តើមឱ្យបានពាន លីគកំពូលកម្ពុជា ឆ្នាំ២០២២នេះ ដើម្បីលុបលាងភាពអាម៉ាស សម្រាប់ការធ្លាក់ទៅឈរនៅលេខ៥ ជាប្រវត្តិសាស្រ្ត លើកដំបូង កាលពីឆ្នាំ២០២១ បន្ទាប់ពីក្លិបមួយនេះ ទទួលបានជោគជ័យ ជាបន្តបន្ទាប់ តាំងពីបង្កើតឡើង កាលពីឆ្នាំ២០១២ គឺការឈ្នះតំណែងជើងឯកនៃលីគកំពូលកម្ពុជា បាន ៤ សម័យកាល នៅក្នុង ២០១២, ២០១៦, ២០១៧ និងឆ្នាំ ២០២០ រួមទាំងឈ្នះជើងឯករង បាន ៣ លើក ក្នុងឆ្នាំ ២០១៣, ២០១៤ ឆ្នាំ ២០១៨ និងបានទទួល លេខ ៣ កាលឆ្នាំ២០១៥។
លោក បែ មករា អ្នកចាត់ការទូទៅក្រុមបឹងកេត បានថ្លែង នៅក្នុងពិធីបង្ហាញឡូហ្គោថ្មី របស់លីគកំពូលកម្ពុជា កាលពីថ្ងៃទី ១០ ខែកុម្ភៈនេះថា៖ «ដូចអ្នកទាំងអស់គ្នាដឹងហើយថា រដូវកាលឆ្នាំ ២០២១ ជារដូវកាលដ៏ខកចិត្តបំផុត សម្រាប់បឹងកេត ដែលមិនធ្លាប់មាននៅក្នុងប្រវត្តិសាស្ត្ររបស់ក្លិប ដោយបានធ្លាក់ទៅលេខ ៥ ជាលើកដំបូង អ៊ីចឹងដើម្បីស្តារមុខមាត់ក្លិបឡើងវិញ ក្នុងរដូវកាលថ្មីនេះ ក្លិបបានរៀបចំនូវផែនការយុទ្ធសាស្ត្រមួយចំនួន ព្រោះគោលដៅរបស់យើង ត្រូវតែឈ្នះជើងឯក»៕