បរទេស៖ ខ្សែប្រយុទ្ធ Jamie Vardy បានបន្តកិច្ចសន្យារយៈពេល១ឆ្នាំទៀត នៅក្លិប Leicester City ដែលនឹងធ្វើឲ្យរូបគេលេងលើសពីខួបកំណើតវ័យ៣៦ឆ្នាំរបស់គេ។ នេះបើយោងទៅតាមការប្រកាសរបស់ក្លិប កាលពីថ្ងៃពុធ។
ក្លិបមានរហស្សនាមថា ចចកកំណាចមួយនេះ បានផ្តល់រង្វាន់នៃការបន្តកុងត្រាថ្មីដល់ខ្សែប្រយុទ្ធរបស់ខ្លួន ក្រោយពីរូបគេបានស៊ុតបាល់បញ្ចូលទី២៣គ្រាប់ ដើម្បីឈ្នះស្បែកជើងមាសរបស់ក្របខ័ណ្ឌ Premier League កាលពីរដូវកាលមុន។ កុងត្រាថ្មីនេះ នឹងធ្វើឲ្យ Vardy វ័យ៣៣ឆ្នាំ បន្តលេងរហូតដល់ចុងរដូវកាលឆ្នាំ២០២២-២០២៣។ Vardy បានឲ្យដឹងថា៖ «ដំណើរដែលខ្ញុំកំពុងតែដើរជាមួយនឹងក្លិបកីឡាបាល់ទាត់នេះ ពិតជាលំបាកក្នុងការពិពណ៌នាណាស់ ហើយបើទោះបីយើងបានទទួលជោគជ័យជាមួយគ្នាជាច្រើនក៏ដោយ ប៉ុន្តែ ខ្ញុំដឹងថា ខ្ញុំត្រូវសម្រេចឲ្យបានសមិទ្ធផលជាច្រើនទៀតជាមួយនឹងក្រុមនេះ ហេតុនេះ ខ្ញុំពិតជាមានអារម្មណ៍ជាពិសេសក្នុងការអាចកំណត់អនាគតរបស់ខ្ញុំជាមួយនឹងក្លិប Leicester City ម្តងទៀត»។
ខ្សែប្រយុទ្ធរូបនេះ បានចូលរួមជាមួយនឹងក្លិប Leicester ពីក្លិបគ្មានលីក Fleetwood Town កាលពីឆ្នាំ២០១២។ រូបគេបានស៊ុតបាល់បញ្ចូលទី១២៩គ្រាប់ ក្នុងការបង្ហាញខ្លួន៣០៩ សម្រាប់ក្លិប Leicester និងជាកីឡាករទី៤ដែលរកបានគ្រាប់បាល់ច្រើនជាងគេបំផុតរបស់ក្លិបនេះ។ Leicester បានបញ្ចប់ក្នុងចំណាត់ថ្នាក់លេខ៥ លើតារាង Premier League ហើយនឹងលេងក្នុងក្របខ័ណ្ឌ Europa League នារដូវកាលក្រលយ៕
ប្រភពព័ត៌មាន៖ Channel News Asia