គ្រូបង្វឹកក្រុមណាហ្គាវើល លោក មាស ចាន់ណា បានចាត់ទុក ការធ្លាក់ទៅឈរនៅលេខ៦ នៅក្រោយការបញ្ចប់ការប្រកួតលីកកំពូលកម្ពុជា ឆ្នាំ២០២០ របស់ក្រុមលោក វាកើតចេញពីការអត់សំណាង ដោយលោកបានអះអាងថា បើក្រុមលោកមានសំណាង ឬឈ្នះគ្រប់ការប្រកួត ដែលសមនឹងឈ្នះ ណាហ្គាវើល បានឡើងទៅឈរនៅលេខ១ បាត់ទៅហើយ។
លោក មាស ចាន់ណា បាននិយាយថា៖«អ្វីដែលខ្ញុំពេញចិត្ត នៅក្នុងការប្រកួតជើងទី១ គឺការលេងរបស់កីឡាករ ដែលការលេងចូលគ្នារបស់ពួកគាត់ កាន់តែល្អទៅៗ បើទោះបីជាពេលនេះ យើងឈរនៅត្រឹមលេខ៦ក៏ដោយ។ សរុបទៅ ៤ទៅ៥ប្រកួតហើយ ដែលខ្ញុំអត់សំណាង គឺខ្ញុំចង់និយាយថា យើងមានឱកាសឈ្នះគ្រប់ប្រកួតទាំងអស់ ប៉ុន្តែយើងបែរជាអត់សំណាង»។
គ្រូបង្វឹកវ័យក្មេងរូបនេះ បានបន្ថែមថា៖ «បើសិនជារាល់ការប្រកួតទាំងនោះ ក្រុមខ្ញុំឈ្នះទាំងអស់វិញ នោះប្រហែលជាយើងផ្លាស់ប្តូរ ទៅឈរលេខ១ បាត់ទៅហើយ តែវាទាក់ទងនឹងសំណាង ដូចយើងឃើញស្រាប់ហើយ សម្រាប់ការប្រកួតចុងក្រោយជាមួយ វិសាខា យើងអត់មានសំណាង ព្រោះយើងឈ្នះ យើងបានឡើងទៅលេខ៣ បាត់ទៅហើយ គឺខុសគ្នាតែមួយ១នាទី យើងបានធ្លាក់មកឈរនៅលេខ៦វិញ»។
គួររំឭកថា សម្រាប់ការប្រកួតបញ្ចប់ជើងទី១ ជាមួយក្រុម វិសាខា កីឡាករ ឡេង មករា រកបានគ្រាប់បាល់នាំមុខឲ្យក្រុមណាហ្គាវើល តាំងពីនាទីទី៥៧ ហើយការនាំមុខនេះ បានអូសបណ្តាលដល់នាទីទី៩០+៤ ប៉ុន្តែខណៈការប្រកួតនៅសល់១នាទីទៀត នឹងបញ្ចប់ ខ្សែប្រយុទ្ធ ពាក់លេខ៣៣ Mihaljevic បែរជាអាចតែតបាល់បញ្ចូលទី ចេញពីការស៊ុតរបស់ ច្រឹង ពលរដ្ឋ ផុតដៃអ្នកចាំទី ស៊ូ យ៉ាទី ដ៏មិនគួរឲ្យចង់ជឿ ដើម្បីជួយឲ្យ វិសាខា ស្មើគ្នា ១-១ ជាមួយ ណាហ្គាវើល។
ការបញ្ចប់ក្នុងលទ្ធផលស្មើ ១-១ នេះ បានធ្វើឲ្យក្រុមណាហ្គាវើល ដែលហៀបនឹងបានឡើងទៅឈរនៅលេខរៀងទី៣ ដោយមាន២៤ពិន្ទុទៅហើយនោះ បែរជាធ្លាក់មកឈរនៅលេខ៦ ដោយមានត្រឹម២២ពិន្ទុ ស្មើជាមួយក្រុមភ្នំពេញក្រោន សម្រាប់ការប្រកួតទាំង១២លើក នៅជើងទី១នេះ។
ប៉ុន្តែការបាត់ឱកាសរបស់ណាហ្គាវើល បែរជាបានជួយឲ្យក្រុម កងយោធពលខេមរភូមិន្ទ ដែលបានយកឈ្នះក្រុមអគ្គិសនីកម្ពុជា ៤-២ សម្រាប់ការប្រកួតចុងក្រោយរបស់ខ្លួន បែរជាអាចឡើងពីលេខ៦ តៅឈរនៅលេខ៤ ដោយមាន២៣ពិន្ទុ ស្មើជាមួយក្រុមឈរនៅលេខ៤ វិសាខា ខណៈ បឹងកេត ដណ្តើមយកលេខ១ ពីក្រុមម្ចាស់ផ្ទះ ព្រះខ័នរាជស្វាយរៀង បានសម្រេច ក្រោយយកឈ្នះ ៤-២ ដើម្បីមាន៣២ពិន្ទុ លើសក្រុមស្វាយរៀង ១ពិន្ទុវិញ៕