«វាមិនមែនជាឆ្នាំរបស់ខ្ញុំ» នេះជាសាស័ព្ទ របស់គ្រូបង្វឹកក្រុមណាហ្គាវើល លោក មាស ចាន់ណា បានបង្ហោះនៅលើហ្វេសប៊ុករបស់ខ្លួន បន្ទាប់ពីលោក មិនអាចដឹកនាំក្រុមខ្លួន បន្តយកឈ្នះលើក្រុមយោធពលខេមរភូមិន្ទ (ទ័ព) ក្នុងការប្រកួតជើងទី២ លីកកំពូលកម្ពុជា ឆ្នាំ២០២០ នៅពហុកីឡដ្ឋានស្តាតចាស់។
ការបង្ហាញសាព័ព្ទ ជាភាសាអង់គ្លេស «It is not my year» ដែលមានន័យជាភាសាខ្មែរថា «វាមិនមែនជាឆ្នាំរបស់ខ្ញុំ» អមជាមួយរូបភាព និងលទ្ធផលប្រកួតស្មើគ្នា ១-១ ជាមួយក្រុមទ័ព កាលពីយប់ថ្ងៃសៅរ៍ នោះ វាបានបង្ហាញឲ្យកាន់តែច្បាស់ថា លោក មាស ចាន់ណា បែបទប់អារម្មណ៍ខ្លួនឯងលែងចង់បានហើយ ចំពោះលទ្ធផល ដែលតែងតែកើតមានឡើងបែបនេះ ទៅលើក្រុមណាហ្គាវើល។
ការវាយតម្លៃបែបនេះ ក៏ព្រោះលោក មាស ចាន់ណា ធ្លាប់បានទម្លាយថា ការបញ្ចប់ត្រឹមចំណាត់ថ្នាក់លេខ៦ ដោយមានត្រឹម២២ពិន្ទុ ក្នុងជើងទី១ ដោយសារក្រុមរបស់លោក អត់មានសំណាង។ លោកនិយាយថា៖«សរុបទៅ ៤ទៅ៥ប្រកួតហើយ ដែលខ្ញុំអត់សំណាង ចង់និយាយថា យើងមានឱកាសឈ្នះគ្រប់ប្រកួតទាំងអស់ ប៉ុន្តែយើងបែរជាអត់សំណាង បើសិនជារាល់ការប្រកួតទាំងអស់នោះ ខ្ញុំឈ្នះទាំងអស់វិញ នោះប្រហែលជាយើងផ្លាស់ប្តូរ ទៅឈរលេខ១ បាត់ទៅហើយ»។
យ៉ាងណាមិញ សម្រាប់ការប្រកួតជាមួយក្រុមទ័ព កាលពីយប់ថ្ងៃសៅរ៍នោះ ក្រុមណាហ្គាវើល របស់លោក មាស ចាន់ណា ពិតជាអត់មានសំណាង ក្នុងការឈ្នះបាន៣ពិន្ទុមែន ព្រោះនៅក្នុងការប្រកួតដ៏តានតឹងនេះ ខ្សែប្រយុទ្ធពាក់លេខ១៤ Marcio បានស៊ុតរកគ្រាប់បាល់នាំមុខឲ្យ ណាហ្គាវើល នៅនាទីទី៦៨ ប៉ុន្តែក្តីសង្ឃឹមបន្តឈ្នះទ័ព ទៅលើការឈ្នះ ៤-១ កាលពីជើងទី១ ត្រូវបានរលាយបាត់ ដ៏មិនគួរឲ្យចង់ជឿ។
គ្រាប់បាល់តាមស្មើរបស់ក្រុមទ័ព បានកើតមានឡើង នៅនាទីទី៧៣ ប៉ុន្តែការស៊ុតហ្រ្វីឃីកបញ្ចូលទីរបស់ខ្សែប្រយុទ្ធពាក់លេខ៩ Marcolino ដែលទើបចាកចេញពីក្រុមអង្គរថាយហ្គឺរ ត្រូវបានគេមើលឃើញថា ជាសំណាង ច្រើនជាងបច្ចេកទេស ព្រោះ Marcolino បានភ្លាត់ជើងខ្លួនឯងដួល ជាមួយការទាត់បាល់នោះ តែការដួលរបស់គេ បានធ្វើឲ្យអ្នកចាំទី ស៊ូ យ៉ាទី ស្មានបាល់ខុស ដោយលោតមុន ខណៈបាល់ធ្លាក់ពីបុកដី មុខទី រួចក៏លោតផុតដៃ ស៊ូ យ៉ាទី ដ៏គួរឲ្យអស់សំណើច។
យ៉ាងណាក៏ដោយ ក្រុមទ័ព ពិតជាមានការសប្បាយរីករាយខ្លាំង ជាមួយគ្រាប់បាល់នេះ ព្រោះវាបានជួយឲ្យពួកគេ បញ្ចប់ការប្រកួតស្មើគ្នា ១-១ ជាមួយក្រុមណាហ្គាវើល ហើយការទទួលបាន១ពិន្ទុនេះ ធ្វើឲ្យពួកគេ មាន២៤ពិន្ទុ ខណៈណាហ្គាវើល មាន២៣ពិន្ទុ។ ក្រោយការប្រកួតនេះដែរ លោក មាស ចាន់ណា បានបង្ហោះរូបភាពខ្លួនឯង រួចសរសេរថា៖«មើលតែមុខ ក៏ដឹងអត់ហុងស៊ុយដែរ»៕