បរទេស៖ លោក Lucien Favre បានទទួលស្គាល់កាលពីថ្ងៃចន្ទ ក្លិប Borussia Dortmund នឹងធ្វើដំណើរការទៅកាន់ទីក្រុងរ៉ូមទាំងភាពស្ទាក់ស្ទើរ ខណៈដែលលោកសម្លឹងរកការផ្លាស់ប្តូរតំបន់ការពារពេលប្រកួតជាមួយនឹងក្រុម Lazio ក្នុងក្របខ័ណ្ឌ Champions League។
លោក Favre គ្រូបង្វឹករបស់ក្រុម Dortmund បានសម្តែងពីក្តីកង្វល់នានា អំពីការធ្វើដំណើរទៅកាន់រដ្ឋធានីអ៊ីតាលី ខណៈដែលករណីនៃវីវុសកូរ៉ូណា កើនឡើងទូទាំងអឺរ៉ុប។ លោក Favre សញ្ជាតិស្វ៊ីស បានឲ្យដឹងថា៖ «យើងត្រូវតែមានការប្រុងប្រយ័ត្ន។ វាពិតជាគ្រោះថ្នាក់ណាស់។ ពេលនេះ មានករណីឆ្លងកាន់តែច្រើន។ នេះមិនមែនជារឿងល្អក្នុងការធ្វើដំណើរឡើយ»។ លោកបានបន្ថែមទៀតថា៖ «យើងត្រូវតែមានភាពឆ្លាតវៃ។ យើងត្រូវតែគិតអំពីកីឡាកររបស់យើង»។
Lazio បានកម្តៅសាច់ដុំសម្រាប់ការប្រកួតក្របខ័ណ្ឌ Champions League ជាលើកទី១របស់ពួកគេ ក្នុងរយៈពេល១៣ឆ្នាំ តាមរយៈការរងបរាជ័យនៅលើទឹកដីក្រុម Sampdoria ៣-០ ដែលបានធ្វើឲ្យលោកគ្រូបង្វឹក Simone Inzaghi ខឹងសម្បារចំពោះកូនក្រុមខ្លួន ក្រោយពីរកបានត្រឹមតែ៤ពិន្ទុគត់ពីការប្រកួត៤លើក។ ក្រុម Dortmund កំពុងតែស្ថិតក្នុងចំណាត់ថ្នាក់លេខ៣ នៅលើតារាងក្របខ័ណ្ឌ Bundesliga ដោយមាន៩ពិន្ទុ ពីការប្រកួត៤លើក ហើយពួកគេទើបតែបានយកឈ្នះលើក្រុម Hoffenheim ១-០៕
ប្រភពព័ត៌មាន៖ Channel News Asia
