បរទេស៖ លោក Martin Keown វីរបុរសក្រុមកាំភ្លើងធំ Arsenal បានវាយតម្លៃនិង កោតសរសើរទម្រង់លេង របស់ Thomas Partey បន្ទាប់ពីរូបគេបានបង្ហាញខ្លួនចូលលេងជាលើកដំបូងជាមួយក្រុមម្ចាស់ផ្ទះ Rapid Vienna ក្នុងការប្រកួតក្របខណ្ឌ Europa League កាលពីយប់ថ្ងៃព្រហស្បតិ៍ដោយការវាយបកផ្តួលក្រុម ជើងខ្លាំងរបស់អូទ្រីសក្នុងលទ្ធផល២ទល់និង១។
ទោះបីជាមិនបានរកគ្រាប់បាល់បញ្ចូលទីក្នុងការប្រកួតនេះប៉ុន្តែអតីតកីឡាករក្រុម Atletico Madrid សញ្ជាតិហ្កាណា២៧ឆ្នាំបានបង្ហាញទម្រង់លេងធ្វើអោយអតីតខ្សែការពារប្រវត្តិសាស្រ្តរបស់ក្លឹបហ៊ានវាយតម្លៃនិងប្រៀប ធៀបសមត្ថភាពរូបគេទៅនិងអតីតមិត្តរួមក្រុមដែលបច្ចុប្បន្នជាគ្រូបង្វឹកក្លឹប Nice គឺលោក Patrick Vieira នោះឯង។
ថ្លែងប្រាប់ BT Sport លោក Keown បានបញ្ជាក់បន្ថែមថាៈ គាត់បានដើរតួនាទីយ៉ាងល្អនៅតំបន់បម្រើកណ្តាល និងអាចផ្លាស់ទៅទៅច្រើនកន្លែងដើម្បីជួយក្រុម។ យើងហាក់មានអារម្មណ៏ប្លែកនៅពេលដែលចំនុចខ្វះខាត ខ្លះ របស់ក្រុមត្រូវបានបំពេញដោយរូបគេ (Partey)។ Partey ក៏សង្ឃឹមថានិងទទួលបានទំនុកចិត្តពីលោក Mikel Arteta ក្នុងការបង្ហាញខ្លួនពេល Arsenal ជួបជាមួយក្រុមកញ្ជ្រោងខៀវ Leicester City នៅកុ្របខណ្ឌ Premier League នាល្ងាចថ្ងៃអាទិត្យផងដែរ៕
ប្រភពព័ត៍មាន៖ Sportsmole