បរទេស៖ ក្រុម Manchester City បានខិតកាន់តែកៀកឆ្ពោះទៅកាន់វគ្គ៨ក្រុមចុងក្រោយនៃក្របខ័ណ្ឌ Champions Leaue ក្រោយពីបានយកឈ្នះលើក្រុម Borussia Moenchengladbach ក្នុងលទ្ធផល ២-០ កាលពីថ្ងៃពុធ ប៉ុន្តែ លោកគ្រូបង្វឹក Pep Guardiola បានបញ្ជាក់ថា ក្រុមរបស់លោកនៅតែត្រូវការ «ភាពមុតស្រួចបន្ថែមទៀតក្នុងតំបន់ប្រយុទ្ធ»។
គ្រាប់បាល់តែតបញ្ចូលទីនៅតង់ទី១ពីកីឡាករ Bernardo Silva និងគ្រាប់បាល់ស៊ុតបញ្ចូលទីរបស់ខ្សែប្រយុទ្ធ Gabriel Jesus នៅត់ទី២ ក្នុងការប្រកួតវគ្គ១៦ក្រុមចុងក្រោយ បានបន្តកំណត់ត្រាឈ្នះរបស់ក្រុមលោក Guardiola រហូតដល់ទៅ១៩ប្រកួត ក្នុងរាល់យុទ្ធនាការទាំងអស់។ Man City ដែលកំពុងនាំមុខលើតារាងក្របខ័ណ្ឌ Premier League បានដាក់សម្ពាធយ៉ាងខ្លាំងក្លាលើក្រុម Glabach នៅក្នុងការប្រកួតនេះ ដែលត្រូវបានប្តូរទៅកាន់ប្រទេសហុងគ្រី ដោយសារតែការរិតត្បិតជុំវិញការធ្វើដំណើរលើករណីកូវីដ-១៩ នៅអាល្លឺម៉ង់។
បើទោះបីគ្រប់គ្រងលើគូប្រកួតស្ទើរតែទាំងស្រុងក៏ដោយ ប៉ុន្តែ Man City បានចំណាយពេលដ៏យូរក្នុងការបំបែកតំបន់ការពាររបស់ក្រុម Glabach ក្រោមជំនួយដ៏ធំពីខ្សែការពារអាល់ហ្សេរី Ramy Bensebaini។ ស្របពេលដែលលោក Guardiola បាននិយាយបន្ទាប់ពីការប្រកួតថា លោកពិតជាពេញនឹងលទ្ធផលនេះ ប៉ុន្តែ លោកបានបន្ថែមថា៖ «Man City ត្រូវតែធ្វើឲ្យបានល្អប្រសើរជាងនេះ ដើម្បីប្រជែងដណ្តើមពាន Champions League»៕
ប្រភពព័ត៌មាន៖ Channel News Asia