បរទេស៖ កិច្ចពិភាក្សានានាជាមួយនឹងខ្សែប្រយុទ្ធ Neymar លើការបន្តកិច្ចសន្យាថ្មី «កំពុងតែដំណើរការយ៉ាងរលូន» ស្របពេលដែលការពិភាក្សាផ្សេងៗជាមួយនឹង Kylian Mbappe ក៏នៅតែបន្តផងដែរ។
នេះបើយោងទៅតាមការបញ្ជាក់របស់លោក Leonardo នាយកផ្នែកកីឡារបស់ក្លិប Paris Saint-Germain កាលពីថ្ងៃព្រហស្បតិ៍។ តារាឆ្នើមទាំង២របស់ក្រុមម្ចាស់ជើងឯកបារាំងរូបនេះ ដែលជាកីឡាករមានតម្លៃខ្លួនខ្ពស់ជាគេបំផុតក្នុងពិភពលោក សុទ្ធសឹងត្រូវផុតកិច្ចសន្យានៅខែមិថុនា ឆ្នាំ២០២២។ បណ្តាញសារព័ត៌មានជាច្រើនបានចេញផ្សាយថា ការព្រមព្រៀងគ្នាមួយជាមួយនឹង Neymar ត្រូវបានឈានដល់រួចជាស្រេច។ លោក Leonardo បានប្រាប់ស្ថានីយ៍វិទ្យុ France Bleu Paris ថា៖ «កិច្ចសន្យាកំពុងតែដំណើរការយ៉ាងរលូន។ ប៉ុន្តែ នៅល្ងាចថ្ងៃនេះ កិច្ចសន្យាមួយនឹងត្រូវចុះហត្ថលេខា នៅពេលដែលវាតម្រូវឲ្យចុះហត្ថលេខា ប៉ុន្តែ ការចុះហត្ថលេខាមិនទាន់កើតឡើងនៅឡើយទេ»។
Mbappe ដែលបានចូលរួមជាមួយនឹងក្រុម PSG ដូច Neymar កាលពីឆ្នាំ២០១៧ដែរនោះ ត្រូវបានទាក់ទងឲ្យផ្ទេរទៅកាន់ក្លិប Real Madrid។ លោក Leonardo បានបញ្ជាក់ថា៖ «យើងកំពុងតែពិភាក្សាជាមួយនឹង Mbappe។ យើងបានពិភាក្សាជាយូរមកហើយ។ ពេលនេះ យើងកាន់តែមានភាពច្បាស់លាស់។ យើងនឹងឈានដល់ដំណាក់កាលដែលយើងត្រូវតែរក្សាជំហរ និងការសម្រេចចិត្ត»៕
ប្រភពព័ត៌មាន៖ Channel News Asia
