បរទេស៖ អតីតខ្សែប្រយុទ្ធ Arsenal, Barcelona និងជម្រើសជាតិបារាំង Thierry Henry បានលាឈប់ពីតំណែងជាអ្នកចាត់ការទូទៅក្លិប CF Montreal ដែលកំពុងមានវត្តមានលេងនៅក្របខ័ណ្ឌលីកកំពូល សហរដ្ឋអាមេរិក (Major League Soccer) ជាផ្លូវការក្រោយចូលមកបំពេញការងារចាប់តាំងពីខែវិច្ឆិកាឆ្នាំ ២០១៩មកម្លេះ។ Henry បច្ចុប្បន្នមានវ័យ ៤៣ ឆ្នាំដែលស្ថិតនៅក្នុងបេក្ខភាពអាទិភាពដើម្បីដឹកនាំក្លឹបBournemouth នៅក្របខណ្ឌ Championship ដែលជាលីកលំដាប់ទី២អង់គ្លេសផងដែរនោះ។
Henry បានបញ្ជាក់ប្រាប់មូលហេតុយ៉ាងដូច្នេះថា៖ «ជាការសម្រេចចិត្តដ៏ពិបាកបំផុត និងប្រឈមខ្លាំងពេលដែលចាកចេញ ឆ្ងាយពីក្រុមគ្រួសាររបស់គាត់។ ហើយដោយសារតែជំងឺរាតត្បាតទូទាំងពិភពលោកខ្ញុំមិនអាចជួបនិងមើលថែកូនៗរបស់ខ្ញុំទេ។ ជាអកុសលដោយសារតែការរឹតបន្តឹងដែលកំពុងបន្តហើយការបែកគ្នានេះគឺធំធេងពេកសម្រាប់ខ្ញុំនិងកូនៗរបស់ខ្ញុំ»។ Henry បានបន្ថែមទៀតថាលោកនឹងវិលត្រឡប់ទៅកាន់ទីក្រុងឡុងដ៍វិញហើយថ្លែងអំណរគុណដល់ក្លឹប Montreal ដែល បានផ្តល់ឪកាសដ៏អស្ចារ្យដើម្បីដឹកនាំពួកគេទៅប្រកួតជម្រុះ (Play-off) ជាលើកដំបូងចាប់តាំងពីឆ្នាំ ២០១៦។
Henry ក៏ធ្លាប់មានបទពិសោធន៏ដឹកនាំក្លឹបដែលខ្លួនធ្លាប់ចាប់អាជីពដំបូងគឺ Monaco បាន៣ខែនៅរដូវកាល ២០១៨-២០១៩ ក្រោយលាលែងតួនាទីជាជំនួយការរបស់គ្រូបង្វឹកបែលហ្ស៊ិកលោក Roberto Martinez រួចមក៕
ប្រភពព័ត៍មាន៖ BBC
