បរទេស៖ លោក Brendan Rodgers បានលើកទឹកចិត្តឲ្យក្រុម Leicester ជម្នះលើឧបស័គ្គនានា ខណៈដែលវិបត្តិកីឡាកររបួសដែលកំពុងកើនឡើង កំពុងគំរាមដល់កិច្ចខិតខំប្រឹងប្រែងរបស់ពួកគេ ដើម្បីបញ្ចប់ក្នុងចំណាត់ថ្នាក់កំពូលទាំង៤ក្នុងក្របខ័ណ្ឌ Premier League។
ក្រុមរបស់លោក Rodgers បានបាត់បង់ខ្សែបម្រើឆ្នើម Harvey Barnes ដោយសារតែរបួសជង្គង់ឆ្វេង អំឡុងពេលពួកគេបានរងបរាជ័យក្នុងលទ្ធផល ៣-១ ក្រោមស្នាដៃក្រុម Arsenal កាលពីថ្ងៃអាទិត្យ។ Barnes ដែលនឹងទទួលការវះកាត់នៅថ្ងៃអង្គារនេះ អាចនឹងត្រូវអវត្តមានរហូតដល់ទៅ៦សប្តាហ៍។ ខ្សែបម្រើអន្តរជាតិអង់គ្លេសរូបនេះ ចូលរួមជាមួយនឹងមិត្តរួមក្រុម Ayoze Perez, Dennis Praet, James Maddison, Wesley Fofana, James Justin និង Wes Morgan ក្នុងបញ្ជីឈ្មោះកីឡាករដែលរបួស ដែលនាំឲ្យក្រុម Leicester ប្រឈមមុខនឹងការងារដ៏លំបាកក្នុងការប្រជែងយកកៅអីទៅកាន់ក្របខ័ណ្ឌ Champions League។
ប៉ុន្តែ លោក Rodgers កំពុងតែព្យាយាមនិយាយពីសុទិដ្ឋិនិយម នៅមុនពេលការធ្វើដំណើរទៅប្រកួតនៅលើទឹកដីក្រុម Burnley នៅរាត្រីថ្ងៃពុធ ស្អែកនេះ ដោយលោកបានលើកឡើងថា៖ «ខ្ញុំគិតថា យើងឃើញថា ក្រុមមួយចំនួនក៏មានបញ្ហានេះដែរ។ បញ្ហានេះពិតជាលំបាក ប៉ុន្តែ កីឡាករបង្ហាញពីកម្រិតលេងដ៏អស្ចារ្យ រហូតដល់ចំណុចនេះ»៕
ប្រភពព័ត៌មាន៖ Channel news Asia