បរទេស៖ លោក Brendan Rodgers បាននិយាយថា កីឡាកររបស់លោកអាច «បង្កើតកេរិ៍្តដំណែលដ៏អស្ចារ្យមួយ» ប្រសិនបើពួកគេក្លាយជាក្រុម Leicester ដំបូងគេដែលបានឈ្នះពាន FA Cup នៅថ្ងៃសៅរ៍ ក្រោយពីការរងបរាជ័យ៤លើក ក្នុងវគ្គផ្តាច់ព្រ័ត្រ។
ក្រុម Leicester នឹងត្រូវប៉ះជាមួយនឹងក្រុម Chelsea ដែលឈានទៅប្រកួតក្របខ័ណ្ឌ Champions League វគ្គផ្តាច់ព្រ័ត្រ ក្នុងយុទ្ធនាការពានធំជាងគេបំផុតរបស់អង់គ្លេស ខណៈដែលនេះគឺជាលើកទី១ហើយដែលក្រុម Leicester បានឈានដល់វគ្គផ្តាច់ព្រ័ត្រ បើគិតចាប់តាំងពីឆ្នាំ១៩៦៩។ កីឡាករជាច្រើនរួមទាំងខ្សែប្រយុទ្ធ Jamie Vardy នៅតែរក្សាវត្តមានក្នុងក្រុមដែលបានបង្កើតការភ្ញាក់ផ្អើលដ៏ធំបំផុតមួយក្នុងប្រវត្តិសាស្ត្រកីឡាបាល់ទាត់អង់គ្លេសតាមរយៈការឈ្នះពានក្របខ័ណ្ឌ Premier League ក្នុងឆ្នាំ២០១៦។ ប៉ុន្តែ តារាឆ្នើមៗទើបតែរះជាច្រើនមិនបានស្ថិតក្នុងក្រុមនេះឡើយ ហើយលោក Rodgers បាននិយាយថា បច្ចុប្បន្នពួកគេអាចបង្កើតប្រវត្តិសាស្រ្តដោយខ្លួនឯងបាន សម្រាប់ក្លិបដែលមានម្ចាស់កម្មសិទ្ធិជាជនជាតិថៃមួយនេះ។ អ្នកគាំទ្រចំនួន២១០០០នាក់ នឹងបង្ហាញវត្តមាននៅកីឡដ្ឋាន Wembley ខណៈដែលក្លិប Chelsea និង Leicester ត្រូវបានបែងចែកសំបុត្រចំនួន៦២៥០សន្លឹកស្មើគ្នា ខណៈដែលនេះគឺជាគម្រោងសាកល្បងមួយលើការចូលរួមទស្សនាដោយផ្ទាល់របស់អ្នកគាំទ្រ អំឡុងពេលនៃការឆ្លងវីរុសកូរ៉ូណា។
លោក Rodgers បានឲ្យដឹងកាលពីថ្ងៃព្រហស្បតិ៍ថា៖ «យើងបានទទួលសិទ្ធិទៅកាន់វគ្គផ្តាច់ព្រ័ត្រ ហើងយើងនឹងធ្វើដំណើរទៅប្រកួតជាមួយនឹងឱកាសមួយក្នុងការបង្កើតប្រវត្តិសាស្ត្រដោយខ្លួនឯង»៕
ប្រភពព័ត៌មាន៖ Channel News Asia
