បរទេស៖ លោក Brendan Rodgers បានក្លាយជាគ្រូបង្វឹកក្រុមកញ្ជ្រោងខៀវ Leicester Cityដំបូងគេបំផុត ដែលបានដឹកនាំពួកគេអោយឈ្នះពានដ៏ចំណាស់ជាងគេរបស់អង់គ្លេសគឺ FA Cup ក្រោយផ្តួល គូប្រជែងតោខៀវChelsea ក្នុងលទ្ធផល១ទល់និង០ សម្រាប់ការប្រកួតនៅកីឡាដ្ឋាន Wembley កាលពីថ្ងៃសៅរ៏ម្សិលមិញនេះ។
គ្រាប់បាល់ស៊ុតបញ្ចូលទីដ៏អស្ចារ្យពីរយៈចំងាយឆ្ងាយរបស់ខ្សែបម្រើអន្តរជាតិបែលហ្សិកកីឡាករ Youri Tielesman នៅនាទីទី៦៣តង់ទី២បានជួយអោយLeicester City ទទួលបានជ័យជំនះក្នុងការប្រកួតវគ្គ ផ្តាច់ព្រ័ត្រនេះ។ ក្រោយពីអាជ្ញាប្រកាសផ្លុំកញ្ចែបញ្ចប់ការប្រកួត ជាមួយសម្លេង អបអរសាទរយ៉ាងកងរំពងគ្រូបង្វឹកសញ្ជាតិអៀឡង់ខាងជើងរូបនេះ បានបញ្ចេញអារម្មណ៏រំភើបរីករាយជាអនេកមុនពេលបញ្ចេញកាយវិការអោបម្ចាស់ក្លឹប គឺលោក Aiyawatt Srivaddhanaprabhaដែលជាមហាសេដ្ឋីជនជាតិថៃ។ និងបានបន្តតំណែងពី ឪពុក គឺអតីត ម្ចាស់ក្លឹបលោក Vichhai Srivaddhanaprabha ដែលបានរងគ្រោះ ដោយការធ្លាក់ឧទ្ធម្ភាគចក្រ កាលពីខែតុលា ឆ្នាំ២០១៨កន្លងទៅ។
ម្ចាស់ជើងឯកPremier League ឆ្នាំ ២០១៦ និង បច្ចុប្បន្នកំពុងឈរនៅលេខរៀងទី៣បន្ទាប់ពីMan.Utdនិងមានគម្លាតព៦ពិន្ទុពីក្រុមម្ចាស់ជើងឯកចាស់ Liverpool ខណៈការប្រកួតនៅសល់២លើកទៀតប៉ុណ្ណោះនិងត្រូវបិទបញ្ចប់រដូវកាលហើយ។ មានន័យថាពួកគេត្រូវការឈ្នះតែ១ប្រកួតទៀតប៉ុណ្ណោះដើម្បីធានាកៅអីលេងនៅក្របខណ្ឌChampion League រដូវកាលថ្មីខាងមុខនេះផងដែរ៕
ប្រភពព័ត៍មាន៖ BBC