បរទេស៖ Arsenal បានក្លាយជាក្រុមធំជាងគេបំផុតដែលធ្លាក់ចេញពីពាន FA Cup ជុំទី៣ ខណៈដែលក្រុមម្ចាស់ជើងឯក១៤សម័យកាលមួយនេះ បានរងបរាជ័យនៅលើទឹកដីក្រុម Nottingham Forest ក្នុងលទ្ធផល ១-០ ប៉ុន្តែ ក្រុម Liverpool និង Tottenham Hotspur បានគេចផុតពីការធ្លាក់ចេញ ក្រោយពីជួបការភិតភ័យក្នុងពេលប្រកួតជាមួយនឹងក្រុមស្ថិតក្នុងក្របខ័ណ្ឌទាបជាង កាលពីថ្ងៃអាទិត្យ។
នេះមិនមែនជាលើកដំបូងឡើយដែលក្រុម Nottingham Forest បានទម្លាក់ក្រុម Arsenal ក្នុង FA Cup ខណៈដែលពួកគេក៏បានយកឈ្នះលើក្រុមកាំភ្លើងធំកាលពីឆ្នាំ២០១៨ ក្នុងការប្រកួតជុំទី៣ផងដែរ។ លោក Steve Cooper គ្រូបង្វឹករបស់ក្រុម Nottingham Forest បានឲ្យដឹងថា៖ «ខ្ញុំពិតជាមានមោទនភាពដោយសារតែកូនក្រុមរបស់ខ្ញុំណាស់ និងពេញចិត្តនឹងទម្រង់លេងរបស់ពួកគេ។ វាជារឿងដ៏អស្ចារ្យក្នុងការទៅវគ្គបន្ត ហើយខ្ញុំសង្ឃឹមថា ពេលនេះ កីឡាករពិតជាជឿជាក់លើអ្វីដែលពួកយើងកំពុងតែធ្វើ»។
ស្របពេលជាមួយគ្នានេះ ក្រុម Liverpool បានវាយបកពីការដេញតាមពីក្រោយ១គ្រាប់ ដើម្បីយកឈ្នះក្នុងលទ្ធផល ៤-១ លើក្រុម Shrewsbury Town ស្របពេលដែលក្រុម Tottenham បានដេញតាមពីក្រោយរហូតដល់នាទី ទី៧៤ ក្នុងការប្រកួតលើទឹកដីខ្លួនឯង មុននឹងផ្តួលក្រុម Morecambe ក្នុងលទ្ធផល ៣-១៕
ប្រភពព័ត៌មាន៖ Channel News Asia