បរទេស៖ ក្រុមបិសាចក្រហម Manchester United បានជួបសំណាងល្អ ដើម្បីឈានទៅប្រកួតពាន FA Cup ជុំទី៤ ក្រោយពីបានយកឈ្នះលើក្រុម Aston Villa ក្នុងលទ្ធផល ១-០ កាលពីថ្ងៃចន្ទ ក្រោយពីកីឡាករ Scott McTominay រកបានគ្រាប់បាល់នៅដើមតង់។
ខ្សែបម្រើអន្តរជាតិស្កុតឡេនរូបនេះ បានតែតបាល់បញ្ចូលទី ក្រោយពីលេងបានត្រឹមតែ៨នាទី ប៉ុន្តែ Aston Villa បានខ្ជះខ្ជាយឱកាសជាច្រើន ស្របពេលដែលវីដេអូជំនួយការអាជ្ញាកណ្តាល (VAR) បានលុបចោលគ្រាប់បាល់តាមស្មើពីខ្សែប្រយុទ្ធ Danny Ings នៅក្នុងតង់ទី២។
លោក Ralf Rangnick គ្រូបង្វឹកបណ្តោះអាសន្តរបស់ Man United ពិតជាត្រូវការការឆ្លើយតបដ៏ល្អមួយ ចំពោះសប្តាហ៍ពោរពេញដោយភាពជ្រួលច្របល់ នៅក្នុងជំរំហ្វឹកហាត់របស់ Man United ក្រោយពីការបង្ហាញពីទម្រង់លេងយ៉ាងអន់ក្នុងពេលចាញ់ក្រុម Wolves ក្នុងលទ្ធផល ១-០ លើទឹកដីខ្លួនឯង។ បញ្ហាមួយក្នុងចំណោមបញ្ហាចម្បងៗរបស់គ្រូបង្វឹកសញ្ជាតិអាល្លឺម៉ង់រូបនេះ គឺថា Cristiano Ronaldo មិនទាន់មានភាពរឹងមាំគ្រប់គ្រាន់ឡើយ៕
ប្រភពព័ត៌មាន៖ Channel News Asia
