បរទេស៖ Ruben Loftus-Cheek បាននិយាយថា Chelsea បានកំណត់គោលដៅរបស់ខ្លួនលើការសងសឹកលើក្រុម Liverpool ក្នុងការប្រកួតពាន FA Cup វគ្គផ្តាច់ព្រ័ត្រ ក្រោយពីគ្រាប់បាល់បញ្ចូលទីយ៉ាងល្អរបស់ខ្សែបម្រើរូបនេះ បានជួយឲ្យក្រុមខ្លួនដណ្តើមបានជ័យជម្នះក្នុងលទ្ធផល ២-០ លើក្រុម Crystal Palace កាលពីថ្ងៃអាទិត្យ។
ក្រុម Chelsea នឹងត្រូវប៉ះជាមួយនឹងក្រុម Liverpool នៅថ្ងៃទី១៤ ខែឧសភា ក្រោយពីបានជួបគ្នាក្នុងការប្រកួតដណ្តើមពាន League Cup វគ្គផ្តាច់ព្រ័ត្រ កាលពីដើមឆ្នាំនេះ ដែលនៅពេលនោះក្រុមរបស់លោក Jurgen Klopp បានទទួលជ័យជម្នះដោយការស៊ុតបាល់ប៉េណាល់ទី ក្រោយពីការបញ្ចប់ក្នុងលទ្ធផលស្មើ ០-០។ ក្រុមតោខៀវ កំពុងតែសង្ឃឹមថា ពួកគេអាចធ្វើការសងសឹកចំពោះការចាញ់នៅកីឡដ្ឋាន Wembley ខណៈដែលអ្នកចាំទី Kepa Arrizabalaga របស់ Chelsea បានស៊ុតបាល់អត់ចូលទី ដែលនាំឲ្យក្រុម Liverpool លើកពានតែម្តង។ ការជួបគ្នាម្តងទៀតនេះ នឹងក្លាយជាកំណត់ត្រាជាលើកដំបូង បើគិតចាប់តាំងរដូវកាលឆ្នាំ១៩៩២-១៩៩៣ ដែលក្រុមដូចគ្នា២ក្រុម បានប្រកួតគ្នាទាំងក្នុង League Cup វគ្គផ្តាច់ព្រ័ត្រ និង FA Cup វគ្គផ្តាច់ព្រ័ត្រ។
ក្នុងពេលនោះ ក្រុម Arsenal បានផ្តួលក្រុម Sheffield Wednesday ទាំង២លើក ហើយ Loftus-Cheek ប្តេជ្ញាចៀសឲ្យផុតនូវប្រវត្តិសាស្ត្រចំដែលនោះ ដើម្បីរារាំងមិនឲ្យក្រុម Liverpool ឈ្នះជាលើកទី២។ ខ្សែបម្រើរូបនេះបានឲ្យដឹងថា៖ «យើងចង់សងសឹកលើកពួកគេ។ វាគឺជាការប្រកួតដ៏អស្ចារ្យក្នុង League Cup វគ្គផ្តាច់ព្រ័ត្រ តែមិនគួរបញ្ចប់បែបនោះសោះ»៕
ប្រភពព័ត៌មាន៖ Channel News Asia
