បរទេស៖ លោក Josep Maria Bartomeu អតីតប្រធានក្លិប Barcelona ត្រូវបានឃាត់ខ្លួនកាលពីថ្ងៃចន្ទ ខណៈដែលការឃាត់ខ្លួននេះ គឺជាផ្នែកមួយនៃការស៊ើបអង្កេតរបស់ប៉ូលិសទៅលើរឿងអាស្រូវដែលឈ្មោះថា «Barcagate» កាលពីឆ្នាំមុន។ នេះបើយោងទៅតាមប្រភពមួយដែលពាក់ព័ន្ធនឹងករណីនេះ។
លោក Bartomeu ដែលបានលាលែងពីតំណែងរបស់លោកក្នុងនាមជាប្រធានកាលពីខែតុលានោះ បានស្ថិតក្នុងចំណោមមនុស្ស៤នាក់ដែលត្រូវបានឃាត់ខ្លួនក្នុងរយៈពេល៦ថ្ងៃ នៅមុនពេលការបោះឆ្នោតជ្រើសរើសប្រធានថ្មីរបស់ក្លិប នៅថ្ងៃអាទិត្យនេះ។ លោក Oscar Grau នាប្រតិបត្តិបច្ចុប្បន្នរបស់ក្លិប Barcelona លោក Roma Gomez Ponti នាយកសេវាច្បាប់ និងលោក Jaume Masferrer ទីប្រឹក្សារបស់លោក Bartomeu ក៏ត្រូវបានឃាត់ខ្លួនដោយប៉ូលិសប្រចាំតំបន់ Catalonia ផងដែរ ខណៈដែលក្រុមប៉ូលិសបានស្វែងរកភស្តុងតាងនានានៅឯការិយាល័យរបស់ក្លិប កាលពីព្រឹកថ្ងៃចន្ទ។ លោក Grau និង Gomez Ponti ត្រូវបានដោះលែងវិញកាលពីល្ងាចថ្ងៃចន្ទ ប៉ុន្តែ លោក Bartomeu និង Masferrer នឹងត្រូវដេកក្នុងទ្រុងមួយយប់នៅឯស្ថានីយប៉ូលិសក្នុងទីក្រុង Barcelona នៅមុនពេលបង្ហាញខ្លួននៅពីមុខចៅក្រម នៅថ្ងៃអង្គារនេះ។
នេះបើយោងទៅតាមការចេញផ្សាយរបស់បណ្តាញសារព័ត៌មានអេស្ប៉ាញ។ កងកម្លាំងប៉ូលិស Mossos d’Esquadra ប្រចាំតំបន់ Catalonia បានឲ្យដឹងក្នុងសេចក្តីថ្លែងការណ៍មួយថា ការឃាត់ខ្លួននេះ ត្រូវបានធ្វើឡើងជាផ្នែកមួយនេះ ការស៊ើបអង្កេតទៅលើបទឧក្រិដ្ឋ ទាក់ទងនឹងទ្រព្យសម្បតិ្ត និងសណ្តាប់ធ្នាប់សេដ្ឋកិច្ច-សង្គម ដែលកំពុងអូសបន្លាយពេលជិត១ឆ្នាំហើយ៕
ប្រភពព័ត៌មាន៖ Channel News Asia
