បរទេស៖ Marta Garcia ដែលជាម្តាយបង្កើតរបស់ខ្សែបម្រើ Juan Mata របស់ក្រុមបិសាចក្រហម Manchester United បានទទួលមរណភាពបន្ទាប់ពីមានបញ្ហាជំងឺធ្ងន់ធ្ងរយោងសែតប្រចាំថ្ងៃអេស្ប៉ាញ La Nueva Espana បានចុះផ្សាយ។
Mata ដែលតែងតែបង្ហាញវត្តមានជាមួយ បងស្រីឈ្មោះ Paula បានបង្ហើបប្រាប់ក្នុងបទសម្ភាសន៍ជាមួយក្រុម Man United ថាខ្លួនតែងចែករំលែកភាពស្និទ្ធស្នាលជាមួយម្តាយនិងបងស្រីមុនពេលប្រកួតជានិច្ច។ អតីតខ្សែបម្រើក្រុមជម្រើសជាតិអេស្បាញនិងតោខៀវ Chelsea បន្តថា៖ «ម្តាយរបស់ខ្ញុំតែងតែព្រួយបារម្ភអំពីសុខុមាលភាពរាងកាយរបស់ខ្ញុំក្នុងពេលប្រកួតជាងលទ្ធផល។ នោះជាមហេតុដែលខ្ញុំតែងតែហៅឈ្មោះគាត់មិនថានៅជាមួយគ្រូបង្វឹក និងនៅពេលទៅហ្វឹកហាត់និងប្រកួត។ ម្តាយរបស់ខ្ញុំពិតបុគ្គលសំខាន់បំផុតនៅក្នុងជីវិតរបស់ខ្ញុំ។ ខ្ញុំតែងតែធ្វើអ្វីគ្រប់យ៉ាងដែលមាននៅក្នុងដៃរបស់ខ្ញុំដើម្បីអោយគាត់បានសប្បាយរីករាយ។ ព្រោះគាត់សមនឹងទទួលបានវាច្រើនជាងអ្នកដទៃ។
ក្រុមម្ចាស់ជើងឯកអង់គ្លេស២០សម័យបានបង្ហោះសាររំលែកទុក្ខនៅលើបណ្តាញសង្គម Tweeter ដោយ បានរៀបរាប់ថាៈ យើងមានការសោកស្តាយយ៉ាងខ្លាំងចំពោះការបាត់បង់ម្តាយ Juan គឺលោកស្រី Marta Garcia។ ពួកយើងនៅតែគិត និង យកចិត្តទុកដាក់ពីអ្នកនិងក្រុមគ្រួសារជានិច្ច៕
ប្រភពព័ត៍មាន៖ Metro