បរទេស៖ លោក Zinedine Zidane គ្រូបង្វឹកក្លិប Real Madrid បានកោតសរសើរក្រុមរបស់លោកចំពោះកម្រិតបច្ចេកទេសដែលពួកគេបានបង្ហាញដើម្បីឈានទៅវគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League នៅមុនពេលការប្រកួតជើងទី២បស់ពួកគេជាមួយនឹងក្រុម Chelsea នាកីឡដ្ឋាន Stamford Bridge។
លោក Zidane បានប្រាប់អ្នកយកព័ត៌មានកាលពីថ្ងៃអង្គារថា៖ «យើងបានជួបដំណាក់កាល់ដ៏ស្មុគស្មាញជាច្រើន ប៉ុន្តែ សូមអបអរសាទរដល់ក្រុមនេះ ពីព្រោះពួកគេបានបង្ហាញពីភាពខ្លាំង និងមិនដែលលាក់បាំង នៅពេលដែលជួបការលំបាកឡើយ»។ ម្ចាស់ការពារតំណែងជើងឯក១៣សម័យកាល Real Madrid ត្រូវតែបង្ហាញពីទម្រង់លេងដ៏ខ្លាំងរបស់ខ្លួន នៅទីក្រុងឡុងដ៍ ក្រោយពីបានបញ្ចប់ក្នុងលទ្ធផលស្មើ ១-១ លើទឹកដីខ្លួនឯង ក្នុងការប្រកួតជើងទី១ កាលពីសប្តាហ៍មុន។ ប៉ុន្តែ ទោះបីជាយ៉ាងណា លោក Zidane ជឿជាក់ថា ក្រុមរបស់លោកគួរតែទទួលបានកាតចោសរសើរ សម្រាប់ការនៅតែស្ថិតក្នុងការប្រជែងដណ្តើមពាន La Liga និង Champions League ក្រោយពីជួបរដូវកាលដ៏ត្រដាបត្រដួស។
គ្រូបង្វឹករូបនេះបានឲ្យដឹងថា៖ «វាមិនមែនជាអព្ភូតហេតុឡើយ។ យើងបានឈានដល់ដំណាក់កាលដ៏ឆ្ងាយបែបនេះ ដោយសារតែការខិតខំព្យាយាម និងជឿជាក់លើអ្វីដែលយើងកំពុងតែធ្វើ។ យើងស្ថិតនៅកន្លែងដែលយើងចង់ ហើយយើងស័ក្តិសមក្នុងការស្ថិតក្នុងទីតាំងនេះ»៕
ប្រភពព័ត៌មាន៖ Channel News Asia