គ្រូបង្វឹកក្រុមភ្នំពេញក្រោន លោក Oleg Starynskyi បានបង្ហាញការខកចិត្ត ទៅនឹងការរៀបចំកាលវិភាគប្រកួតថ្មីនៃលីគកំពូលកម្ពុជា របស់គណៈកម្មការប្រកួតបាល់ទាត់ជាតិកម្ពុជា (CNCC) ដែលក្រុមភ្នំពេញក្រោន និងក្រុមចំនួន៥ទៀត ប្រកួតបានត្រឹម១លើក សម្រាប់ខែឧសភា និងខែមិថុនា។
ក្លិបភ្នំពេញក្រោន បានដកស្រង់សម្តីគ្រូបង្វឹករបស់ខ្លួន លោក Oleg Starynskyi ហើយបានបង្ហោះនៅលើផេចហ្វេសប៊ុកផ្លូវការរបស់ក្លិបថា៖«យើងទាំងអស់គ្នា នៅក្នុងក្រុម ចង់មានការប្រកួតបន្ថែមទៀត។ យើងបានចាប់ផ្តើមការប្រកួត Pre Season នៅចុងខែវិច្ឆកា ប៉ុន្តែមកដល់ពេលនេះយើងប្រកួតផ្លូវការ បានត្រឹមតែ៣ប្រកួតប៉ុណ្ណោះ ។ ខ្ញុំខកចិត្ត ចំពោះខែឧសភា និងខែមិថុនានេះ ដែលយើង និងក្រុមចំនួន៥ទៀត លេងបានត្រឹមតែ១ប្រកួត»។
សម្រាប់រដូវកាលីគកំពូលកម្ពុជា ឆ្នាំ២០២១នេះ ក្រុមភ្នំពេញក្រោន ទើបប្រកួតបានត្រឹម៣លើកទេ ដោយពួកគេទទួលបានជ័យជម្នះទាំង៣លើក ដោយក្នុងនោះ ភ្នំពេញក្រោន បានយកឈ្នះក្រុមសូលទីឡូអង្គរ ៧-១ ឈ្នះក្រុមគិរីវង់សុខសែនជ័យ ២-១ និងចុងក្រោយបានវាយបកយកឈ្នះក្រុមការពារតំណែងជើងឯក បឹងកេត ២-១ ដូចគ្នា។
យ៉ាងណាក៏ដោយ បើកឱ្យមានការប្រកួតឡើងវិញ នៅចុងសប្តាហ៍ នៃលីកកំពូលកម្ពុជា បន្ទាប់ពីបានពន្យារពេលចូល៣សប្តាហ៍ ដោយសារវិបត្តិផ្ទុះខ្លាំងជំងឺកូវីដ១៩នោះ គឺគ្មានឈ្មោះក្រុមភ្នំពេញក្រោន ត្រូវប្រកួតនោះទេ ដោយពួកគេ ត្រូវសម្រាករហូតដល់ថ្ងៃទី២១ ទើបអាចវិលកាន់ទីលានប្រកួត ដោយពួកគេ ត្រូវស្វាគមន៍ក្រុមខេត្តព្រៃវែង នៅថ្ងៃទី២២ ខែឧសភា។
ចំណែកនៅក្នុងខែមិថុនា លីគកំពូលកម្ពុជា ត្រូវសម្រាកពេញមួយខែតែម្តង ដើម្បីទុកពេលឱ្យក្រុមជម្រើសជាតិ ធ្វើការហ្វឹកហាត់ និងប្រកួត ដែលចាប់ផ្តើមពីថ្ងៃទី២៨ ខែឧសភា រហូតដល់ថ្ងៃទី១៥ ខែមិថុនា ហើយពីថ្ងៃទី៣០ ខែមិថុនា ដល់ថ្ងៃទី៦ ខែកក្កដា គឺក្រុមវិសាខា និងក្រុមបឹងកេត ត្រូវប្រកួតជម្រុះពានរង្វាន់ AFC Cup 2021។
សម្រាប់ការប្រកួតបានត្រឹម១លើក ក្នុងរយៈពេល២ខែនោះ វាបានធ្វើឱ្យលោក Oleg Starynskyi និងក្រុមភ្នំពេញក្រោន ទាំងមូល មិនសូវសប្បាយចិត្ត ហើយលោកបានជាគំនិតថា៖ «តាមគំនិតរបស់ខ្ញុំ កាលវិភាគប្រកួតលីគ គួរតែរៀបចំរបៀបផ្សេងពីនេះ ដែលធ្វើឱ្យក្រុម អាចលេង ២ ឬ៣ប្រកួត នៅក្នុងខែឧសភា ហើយក្រុមជម្រើសជាតិ លេងនៅខែមិថុនា»។
គ្រូបង្វឹកជនជាត់អ៊ុយក្រែន លោក Oleg Starynskyi បានបញ្ជាក់ថា៖«ការប្រកួតលីគកំពូលកម្ពុជា គឺមានការប្រកួតប្រជែងខ្ពស់ណាស់ ដែលក្រុមចំនួន៦ ឬ៧ ប្រជែងគ្នាក្នុងការដណ្តើមពាន ប៉ុន្តែចំនួននៃការប្រកួត គឺមិនគ្រប់គ្រាន់ទេ »៕