សាលាបាល់ទាត់ភ្នំពេញក្រោន បានចាប់ផ្តើមជាផ្លូវការហើយ កាលពីល្ងាចថ្ងៃទី៣ ខែមករា ឆ្នាំ២០២១ ដើម្បីផ្តល់ឱ្យសិស្សានុសិស្ស និងយុវជនគ្រប់កម្រិត ដែលស្រឡាញ់ និងមានទេពកោសល្យលើផ្នែកនេះ បានចូលរួមហ្វឹកហាត់បាល់ទាត់ ទៅតាមជំនាញ បច្ចេកទេស និងក្បួនខ្នាតត្រឹមត្រូវ និងអាចវិវឌ្ឍខ្លួន ក្លាយជាកីឡាករ កីឡាការិនីមានសមត្ថភាព នាពេលអនាគត។
នៅក្នុងពិធីជួបជុំ និងសំណេះសំណាលជាមួយសិស្សានុសិស្ស ដែលបានចុះឈ្មោះចូលហ្វឹកហាត់គ្រប់កម្រិតទាំងអស់ កាលពីថ្ងៃចន្ទ ម្សិលមិញនេះ លោក កែវ សុខង៉ន អ្នកចាត់ការទូទៅក្រុមធំភ្នំពេញក្រោន បានលើកទឹកចិត្ត និងជំរុញឱ្យក្រុមអត្តពលិកវ័យក្មេងទាំងនេះ ខិតខំយកចិត្តទុកដាក់ហ្វឹកហាត់ ដើម្បីក្លាយជាធនធានមានសមត្ថភាព សម្រាប់ទ្រទ្រង់ និងចូលរួមជួយវិស័យបាល់ទាត់ នៅកម្ពុជា នាពេលអនាគត។
អតីតកីឡាករជម្រើសជាតិកម្ពុជា លោក កែវ សុខង៉ន បាននិយាយនៅចំពោះមុខក្រុមសិស្សានុសិស្ស និងក្រុមយុវជនទាំងអស់នោះថា៖ «នេះជាការពេលវេលាដ៏មានន័យ សម្រាប់ប្អូនៗទាំងអស់ ក្នុងការទទួលបានការបណ្តុះបណ្តាល ពីកីឡាបាល់ទាត់ប្រកបដោយបច្ចេកទេស ដើម្បីមានឱកាស បានក្លាយជាធនធានជំនាន់ក្រោយប្រកបដោយគុណភាព និងសមត្ថភាព»។
ជាមួយគ្នានោះ អ្នកគ្រូ ម៉ៅ សាវីន ប្រធានក្រុមការងារបច្ចេកទេស នៃសាលាបាល់ទាត់ភ្នំពេញក្រោន បានផ្តាំផ្ញើក៏ដូចជាស្នើសុំឱ្យប្អូនគ្រប់ៗគ្នា ខិតខំប្រឹងប្រែងក្នុងការហ្វឹកហាត់ ហើយត្រូវបានមានភាពក្លាហាន និងគោលដៅ ពិតប្រាកដ សម្រាប់អាជីព ព្រមទាំងសុខភាពជាដើម។
តាមការប្រកាស នៅក្នុងពិធីសំណេះសំណាលនោះ បានឱ្យដែរថា សម្រាប់ប្អូន ដែលមានចំណាប់អារម្មណ៍ ចូលរួមហ្វឹកហាត់ នៅសាលាបាល់ទាត់ភ្នំពេញក្រោន នៅតែអាចបន្តចុះឈ្មោះបានជាធម្មតា ចាប់ពីម៉ោង ៩:៣០ ព្រឹកដល់ម៉ោង ៦:៣០ ល្ងាច៕