បរទេស៖ លោក Roberto Mancini គ្រូបង្វឹកនៃក្រុមបាល់ទាត់ជម្រើសជាតិអ៊ីតាលី បានកោតសរសើរចំពោះទម្រង់លេងនៃក្រុមរបស់លោក និងបាននិយាយាថា អ៊ីតាលី «បានគ្រប់គ្រង» លើក្រុមបាល់ទាត់ជម្រើសជាតិអង់គ្លេស ក្រោយពីបានរបូតគ្រាប់បាល់នៅដើមតង់ទី១ នាកីឡដ្ឋាន Wembley កាលពីថ្ងៃអាទិត្យ ដើម្បីទទួលជ័យជម្នះក្នុង Euro ឆ្នាំ២០២០ វគ្គផ្តាច់ព្រ័ត្រ។
ក្រោយពីបានទទួលជ័យជម្នះដោយការស៊ុតបាល់ប៉េណាល់ទីក្នុងលទ្ធផល ៣-២ បន្ទាប់ពីការប្រកួតបានបញ្ចប់ក្នុងលទ្ធផលស្មើ ១-១ នៅនាទីបន្ថែម១៥នាទី២ដង លោក Mancini បានប្រាប់ទូរទស្សន៍ RAI Sport ថា៖ «យើងធ្វើបានយ៉ាងល្អ។ យើងបានរបូតគ្រាប់បាល់ភ្លាមៗ និងបានជួបបញ្ហា ប៉ុន្តែ បន្ទាប់មក យើងបានគ្រប់គ្រងការប្រកួត»។ លោកបានបន្ថែមទៀតថា៖ «កីឡាករពិតជាលេងបានយ៉ាងល្អ។ ខ្ញុំមិនដឹងថា ត្រូវនិយាយបែបណាឡើយ។ វាពិតជាសំខាន់ណាស់សម្រាប់រាល់ភាគីពាក់ព័ន្ធ និងអ្នកគាំទ្រទាំងអស់។ ខ្ញុំសង្ឃឹមថា ពួកគេនឹងអបអរនៅប្រទេសអ៊ីតាលី»។
ខ្សែការពារ Leonardo Bonucci បានរកគ្រាប់បាល់តាមស្មើរបស់ខ្សែការពារ Luke Shaw នៅតង់ទី២ ហើយក្រុមទាំង២ មិនអាចរកគ្រាប់បាល់ទៀតឡើយនៅនាទីបន្ថែម១៥នាទី២ដង។ នៅពេលដែលស៊ុតបាល់ប៉េណាល់ទីកាត់សេចក្តី អ្នកចាំទី Gianluigi Donnarumma បានសង្គ្រោះបាល់ចំនួន២លើក ក្រោយពី Marcus Rashford បានស៊ុតបាល់ប៉ះនឹងបង្គោលទី។ អ៊ីតាលី បានឈ្នះពានជាលើកទី២របស់ពួកគេ បន្ទាប់ពីឆ្នាំ១៩៦៨។ ខ្សែការពារ Bonucci វ័យ៣៤ឆ្នាំ បានឲ្យដឹងថា៖ «នេះគឺជារឿងដ៏មិនគួរឲ្យ នៅពេលដែលខ្ញុំគិពីកន្លែងដែលយើងបានចាប់ផ្តើម»៕
ប្រភពព័ត៌មាន៖ Channel News Asia
