បរទេស៖ ក្រុមជើងខ្លាំងសហរដ្ឋអាមេរិក ដែលមានក្តីសង្ឃឹមខ្ពស់ក្នុងការឈ្នះមេដាយមាស បានចាប់ផ្តើមដំណើរស្វែងរកពានកីឡាបាល់ទាត់អូឡាំពិកជាលើកទី៥ ជាមួយនឹងការរងបរាជ័យដ៏ខកចិត្តក្នុងលទ្ធផល ៣-០ ក្រោមស្នាដៃក្រុមបាល់ទាត់នារីស៊ុយអែត។
ស្របពេលជាមួយគ្នានេះ ក្រុមបាល់ទាត់ជម្រើសជាតិនារីចក្រភពអង់គ្លេស បានចាប់ផ្តើមយុទ្ធនាការរបស់ខ្លួនក្នុងព្រឹត្តិការណ៍អូឡាំពិកទីក្រុងតូក្យូតាមរយៈការផ្តួលក្រុមជម្រើសជាតិស៊ីលី កាលពីថ្ងៃពុធ ហើយហូឡង់ បានស៊ុតបាល់បញ្ចូលទីដល់ទៅ១០គ្រាប់ ដើម្បីផ្តួលក្រុមជម្រើសជាតិហ្ស៊ុំប៊ី។ ក្រុមជម្រើសជាតិនារីអាមេរិក បានឈ្នះពានចំនួន៤លើក ក្នុងចំណោមពានអូឡាំពិកចំនួន៦លើក បើគិតចាប់តាំងពីកីឡាបាល់ទាត់នារីត្រូវបានបង្កើតឡើងក្នុងព្រឹត្តិការណ៍កីឡានេះ ក្នុងឆ្នាំ១៩៩៦ ប៉ុន្តែ បានរងបរាជ័យដ៏ខកចិត្តក្រោមស្នាដៃក្រុមដែលបានទម្លាក់ពួកគេដោយការស៊ុតបាល់ប៉េណាល់ទី ក្នុងវគ្គ៨ក្រុមចុងក្រោយ ក្នុងទីក្រុង Rio។
កីឡាការិនី Stina Blackstenius បានស៊ុតបាល់បញ្ចូលទី២គ្រាប់ នៅមុនពេលកីឡាការិនីបម្រុង Lina Hurtig បានបន្ថែមគ្រាប់បាល់ទី៣ សម្រាប់ក្រុមម្ចាស់មេដាយប្រាក់ឆ្នាំ២០១៦ ស៊ុយអែត ក្នុងការប្រកួតមួយដែលត្រូវបានរៀបចំឡើងនៅកីឡដ្ឋានដែលគ្មានអ្នកទស្សនា Tokyo Stadium ដោយសារតែការរិតត្បិតជុំវិញវីរុសកូវីដ ១៩។ ជាមួយគ្នានេះ ហូឡង់ បានលត់ក្រុមជម្រើសជាតិហ្ស៊ុំប៊ីយ៉ាងចាស់ដៃក្នុងលទ្ធផល ១០-៣ ខណៈដែលចក្រភពអង់គ្លេស បានផ្តួលស៊ីលី ២-០ ក្នុងការប្រកួតថ្ងៃបើកឆាក៕
ប្រភពព័ត៌មាន៖ Channel News Asia
