ព្រឹត្តិការណ៍កីឡាអូឡាំពិករដូវក្ដៅ នាទីក្រុងតូក្យូ ឆ្នាំ២០២០ (Tokyo Olympic Games 2020) នៅប្រទេសជប៉ុន បានប្រារព្ធពិធីបិទការប្រកួតជាផ្លូវការហើយ កាលពីរាត្រីថ្ងៃអាទិត្យ បន្ទាប់ពីដំណើរការប្រកួត រយៈពេល ១៧ថ្ងៃ គឺចាប់ពីថ្ងៃទី២៣ ខែកក្កដា រហូតដល់ថ្ងៃទី០៨ ខែសីហា ឆ្នាំ២០២១។
បើទោះបីជាព្រឹត្តិការណ៍ដ៏ធំ ដែលត្រូវបានធ្វើឡើង៤ឆ្នាំម្តងនេះ ត្រូវបានលើកពេលពីឆ្នាំ២០២០ មកធ្វើនៅឆ្នាំ២០២១នេះ ប៉ុន្តែនៅក្នុងដំណើរការប្រកួតរយៈពេល១៧ឆ្នាំនេះ គឺគ្រប់ផ្នែកទាំងអស់ បានដំណើរការដោយរលូន និងទទួលបានជោគជ័យ គួរឱ្យកត់សម្គាល់ ដែលធ្វើឱ្យពិធីបិទការប្រកួត កាលពីយប់ម្សិលមិញ បានធ្វើឡើងដោយភាពអ៊ឹកអធឹក និងប្រកបដោយភាពសប្បាយរីករាយ។
ជាមួយគ្នានេះ ក្រុមអត្តពលិករបស់សហរដ្ឋអាមេរិក បានប្រាប់ការប្រកួតថ្ងៃចុងក្រោយ កាលពីថ្ងៃអាទិត្យ ដើម្បីបានមេដាយមាសចំនួន២បន្ថែមទៀត ដើម្បីវ៉ាចំនួនមេដាយមាសរបស់ប្រទេសចិនវិញ និងឈរនៅចំណាត់ថ្នាក់លេខ១ ក្នុងនាមជាប្រទេសដណ្តើមបានមេដាយមាសច្រើនជាងគេ។
នៅក្នុងការប្រកួតនេះ សហរដ្ឋអាមេរិក ដណ្តើមបានមេដាយមាសសរុបចំនួន៣៩ រួមទាំងមេដាយប្រាក់ ៤១ និងសំរឹទ្ធ ៣៣ គឺច្រើនជាងប្រទេសចិន ដែលឈរនៅលេខ២ ជាមួយការឈ្នះបានមេដាយមាស៣៨ ប្រាក់៣២ សំរឹទ្ធ១៨ ខណៈម្ចាស់ផ្ទះជប៉ុន ឈរនៅលេខ៣ ដោយឈ្នះបានមេដាយមាស ២៧ ប្រាក់១៤ សំរឹទ្ធ១៧ ហើយចក្រភពអង់គ្លេស ឈរនៅចំណាត់ថ្នាក់លេខ៤។
ចំណែកប្រទេសចំនួន៥៩ទៀត ក៏ដណ្តើមបានមេដាយមាស ពីការប្រកួតកីឡាអូឡាំពិក ក្រុងតូក្យូ ឆ្នាំ២០២០នេះផងដែរ ខណៈប្រទេសផ្សេងទៀត បានឈ្នះត្រឹមមេដាយប្រាក់ និងសំរឹទ្ធ តែប្រទេសមួយចំនួនទៀត មិនដណ្តើមបានមេដាយសោះ ក្នុងនោះក៏មានកម្ពុជា ផងដែរ។
យ៉ាងណាក៏ដោយ នៅក្នុងការប្រកួតនេះ កម្ពុជា បានបញ្ចូនអត្តពលិកត្រឹម៣នាក់ប៉ុណ្ណោះ តាមរយៈការទទួលបានសិទ្ធិអនុគ្រោះ ឱ្យទៅចូលរួម ក្នុងនោះមានកីឡាហែលទឹក ហែម ប៉ុច កីឡាការិនីហែលទឹក ឃឺន ប៊ុនពេជ្រមរកត និងកីឡាករអត្តពលកម្ម ប៉ែន សុខគង់ ក្រោមការដឹកនាំរបស់លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជានាយបេសកកម្ម៕