បរទេស៖ ក្រុមបាល់ទាត់យុវជនជម្រើសជាតិអេស្ប៉ាញ នឹងត្រូវជួបជាមួយនឹងក្រុមម្ចាស់ការពារតំណែងជើងឯកប្រេស៊ីល ក្នុងយុទ្ធនាការកីឡាបាល់ទាត់អូឡាំពិក ផ្នែកបុរស វគ្គផ្តាច់ព្រ័ត្រ ក្រោយពីគ្រាប់បាល់ស៊ុតបញ្ចូលទីយ៉ាងល្អរបស់ Marco Asensio បានជួយឲ្យពួកគេដណ្តើមបានជ័យជម្នះក្នុងលទ្ធផល ១-០ លើក្រុមម្ចាស់ផ្ទះជប៉ុន ក្នុងទីក្រុង Saitama កាលពីថ្ងៃអង្គារ។
ខ្សែបម្រើស្លាបរបស់ក្លិប Real Madrid រូបនេះ បានចូលលេងក្នុងនាមជាកីឡាករបម្រុង និងបានស៊ុតបាល់កោងចូលទីយ៉ាងល្អ នៅនាទី ទី១១៥ ដើម្បីជួយឲ្យក្រុមបាល់ទាត់ជម្រើសជាតិអេស្ប៉ាញឈានទៅវគ្គផ្តាច់ព្រ័ត្រនៃព្រឹត្តិការណ៍អូឡាំពិក ជាលើកទី១ បើគិតចាប់តាំងពីពួកគេបានបញ្ចប់ក្នុងចំណាត់ថ្នាក់លេខ២ ក្នុងអូឡាំពិក ឆ្នាំ២០០០ នាទីក្រុងស៊ីដនី។ Asensio បានឲ្យដឹងថា៖ «យើងបានដឹងថា នឹងក្លាយជាការប្រកួតដ៏លំបាកមួយក្នុងពេលប៉ះក្រុមខ្លាំងមួយ ដែលបានបង្ហាញពីទម្រង់លេងយ៉ាងល្អក្នុងយុទ្ធនាការនេះ។ យើងបានដឹងពីអ្វីដែលយើងត្រូវធ្វើ ហើយជាមួយនឹងការអត់ធ្មត់ និងការខិតខំព្យាយាម វាបានផ្តល់រង្វាន់ដល់យើង»។
ក្រុមបាល់ទាត់ជម្រើសជាតិជប៉ុន នឹងត្រូវប៉ះជាមួយនឹងក្រុមបាល់ទាត់ជម្រើសជាតិម៉ិកស៊ិក ក្នុងការប្រកួតដណ្តើមមេដាយសំរឹទ្ធ នៅថ្ងៃសុក្រ។ ក្រុមជម្រើសជាតិម៉ិកស៊ិក បានរងបរាជ័យដោយការស៊ុតបាល់ប៉េណាល់ទីកាត់សេចក្តីក្នុងលទ្ធផល ៤-១ ក្រោមស្នាដៃក្រុមជម្រើសជាតិប្រេស៊ីល ក្នុងទីក្រុង Kashima ក្រោយពីបានបញ្ចប់ក្នុងលទ្ធផលស្មើ ០-០ ក្នុងរយៈពេល១២០នាទី៕
ប្រភពព័ត៌មាន៖ Channel News Asia