បរទេស៖ ក្រុមម្ចាស់ការពារតំណែងជើងឯកប្រេស៊ីល បានបញ្ចប់ត្រឹមលទ្ធផលស្មើ ០-០ ជាមួយនឹងក្រុមជម្រើសជាតិកូតឌីវ័រ ក្នុងយុទ្ធនាការកីឡាបាល់ទាត់អូឡាំពិកផ្នែកបុរស កាលពីថ្ងៃអាទិត្យ ស្របពេលដែលគ្រាប់បាល់ស៊ុតបញ្ចូលទី៣គ្រាប់របស់ Pierre Gignac បានជួយឲ្យក្រុមជម្រើសជាតិបារាំង ដណ្តើមបានជ័យជម្នះ ៤-៣ លើក្រុមជម្រើសជាតិអាហ្វ្រិកខាងត្បូង ក៏ដូចជារក្សាក្តីសង្ឃឹមក្នុងការទៅវគ្គបន្តរបស់ពួកគេ។
ប្រេស៊ីល ដែលបានឈ្នះមេដាយមាសជាលើកដំបូងកាលពី៥ឆ្នាំមុន លើទឹកដីខ្លួនឯងក្នុងទីក្រុង Rio នោះ គួរតែអាចខិតកាន់តែកៀកឆ្ពោះទៅកាន់វគ្គបន្ត ក្នុងទីក្រុង Yokohama ប៉ុន្តែ បែរជាត្រូវខកចិត្តក្រោមស្នាដៃក្រុមជម្រើសជាតិកូតឌីវ័រទៅវិញ។ ប្រេស៊ីល កំពុងតែនាំមុខក្នុងពូល D ដោយសារតែគ្រាប់បាល់បញ្ចូលទី នៅមុនពេលការប្រកួតចុងក្រោយរបស់ពួកគេ ជាមួយនឹងក្រុមជម្រើសជាតិអារ៉ាប៊ីសាអ៊ូឌីត ដែលបានរងបរាជ័យក្រោមស្នាដៃក្រុមជម្រើសជាតិអាល្លឺម៉ង់ ក្នុងលទ្ធផល ៣-២។
ដោយឡែក បារាំង ស្ទើរតែត្រូវប្រឈមមុខនឹងការធ្លាក់ចេញទៅហើយ ពេលប៉ះក្រុមជម្រើសជាតិអាហ្វ្រិកខាងត្បូង ប៉ុន្តែ ខ្សែប្រយុទ្ធជើងចាស់ Gignac បានសង្គ្រោះក្រុមខ្លួន ក្នុងការប្រកួតដ៏រំភើបនៅ Saitama។ Gignac ដែលបានលេងឲ្យក្លិបម៉ិកស៊ិក Tigres ចាប់តាំងពីឆ្នាំ២០១៥នោះ បានឲ្យដឹងថា៖ «បន្ទាប់ពីគ្រាប់បាល់នីមួយៗរបស់អាហ្រ្វិកខាងត្បូង យើងហាក់មានអារម្មណ៍ថា យើងដូចជាស្ថិតលើយន្តហោះត្រឡប់ទៅផ្ទះវិញអ៊ីចឹង»៕
ប្រភពព័ត៌មាន៖ Channel News Asia
