ស្ថិតក្នុងវ័យ១៣ឆ្នាំ កីឡាការិនីជិះស្គីក្តារបន្ទះ Momiji Nishiya សញ្ជាតិជ៉ុន បានក្លាយជាម្ចាស់មេដាយមាសម្នាក់ក្នុងចំណោមម្ចាស់មេដាយមាសវ័យក្មេងបំផុតក្នុងព្រឹត្តិការណ៍កីឡាអូឡាំពិក។ កីឡាការិនីវ័យក្មេងរូបនេះ បានបង្កើតភ្ញាក់ផ្អើលក្នុងព្រឹត្តិការណ៍កីឡាអូឡាំពិក ក្រោយពីបានផ្តួលគូប្រកួតរបស់ខ្លួនក្នុងវិញ្ញាសាផ្នែកនារី។
Nishiya បានឈ្នះមេដាយមាសកាលពីថ្ងៃចន្ទ ក្នុងវិញ្ញាសាជិះតាមដងវិថីផ្នែកនារី ដែលទើបតែបានបង្ហាញខ្លួនក្នុងទីក្រុងតូក្យូជាលើកដំបូងប៉ុណ្ណោះ។
ក្រោយពីបានឈ្នះមេដាយមាស Nishiya បានឲ្យដឹងថា៖ «ខ្ញុំពិតជារំភើបរហូតដល់ស្រក់ទឹកភ្នែក ពីព្រោះខ្ញុំសប្បាយចិត្តហួសនឹងថ្លែង»។ Nishiya បានបង្ហាញពីស្នៀតយ៉ាងល្អនៅដំណាក់កាលចុងក្រោយ និងទទួលបានពិន្ទុខ្ពស់ជាងគេ ដើម្បីផ្តួលកីឡាការិនីប្រេស៊ីល Rayssa Leal ដែលក៏មានវ័យ១៣ឆ្នាំដូចគ្នាផងដែរ។ ម្ចាស់មេដាយមាសវ័យក្មេងបំផុតនោះគឺកីឡាការិនី Marjorie Gestring ដែលបានទទួលជ័យជម្នះក្នុងវិញ្ញាសាសម្តែងលើផ្ទៃទឹក ក្នុងព្រឹត្តិការណ៍អូឡាំពិក ទីក្រុងប៊ែរឡាំង ឆ្នាំ១៩៣៦ ដែលនៅពេលនោះនាងមានវ័យត្រឹមតែ១៣ឆ្នាំ និង២៦៨ថ្ងៃប៉ុណ្ណោះ៕
