បរទេស៖ ខ្សែការពារ Eric Bailly របស់ក្រុមបិសាចក្រហម Manchester United មានបំណងចង់ពិភាក្សាអំពីអនាគតរបស់ខ្លួនក្រោយពីក្លឹបបានបញ្ចប់កិច្ចព្រៀងផ្ទេរយកខ្សែការពារកណ្តាលម្នាក់ទៀតគឺ Raphael Varane មកកាន់ទឹកដី Old Trafford នៅល្ងាចថ្ងៃអង្គារនេះ។
ក្រុមជើងឯកអង់គ្លេស២០សម័យមួយនេះបានយល់កិច្ចព្រមព្រៀងជាមួយក្រុមអធិរាជស Real Madrid ដើម្បីចុះហត្ថលេខាសមាជិកជ័យលាភី World Cup ឆ្នាំ២០១៨របស់ក្រុមមាន់គកបារាំងក្នុងតម្លៃខ្លួនប្រហែលជា ៤១ លានផោនបូករួមជាមួយនឹងប្រាក់បន្ថែមផ្សងទៀត។ មានន័យថាការមកដល់របស់ Varane គឺជាការព្រួយបារម្ភមួយសម្រាប់ Eric Bailly ដែលនឹងអាចធ្លាក់ចេញពីជម្រើស១១នាក់ដំបូងនៅទឹកដី Old Trafford។
Bailly បច្ចុប្បន្នកំពុងបំពេញតួនាទីសម្រាប់ក្រុមជម្រើសជាតិកូតឌីវ័រនៅព្រឹត្តការណ៏អូឡាំពិកឆ្នាំ ២០២០ នៅប្រទេសជប៉ុន។ បើយោងគេហទំព័រ ESPN បានចុះផ្សាយថាកីឡាករវ័យ ២៧ ឆ្នាំរូបនេះចង់ពិភាក្សាដោយផ្ទាល់ជាមួយគ្រូបង្វឹក និងថ្នាក់ដឹកនាំក្លឹបដើម្បីពិភាក្សាពីអនាគតរបស់ខ្លួនក្រោយត្រឡប់ពីប្រទេសជប៉ុនមកកាន់ទីក្រុង Manchester វិញ។ គួរបញ្ជាក់ថាក្រុមលោក Solskjaer នឹងមានខ្សែការពាររហូតដល់ទៅ ៧ នាក់ឯណោះនៅពេលដែល Varane បានបញ្ចប់ការផ្ទេរមកកាន់ទឹកដី Old Trafford។
ដែលក្នុងនោះរួមមានប្រធានក្រុម Harry Maguire ខណៈ Victor Lindelof គ្រោងនឹងប្រជែងជាមួយ Varane ផងដែរ សម្រាប់ជម្រើសដំបូង ខណៈ ដែល Phil Jones, Axel Tuanzebe និង Teden Mengi ត្រូវបានគេរំពឹងថានឹងចាកចេញពីក្លិបជាអចិន្ត្រៃយ៍ ឬខ្ចីជើងមុនពេលទីផ្សារដោះដូរកីឡាករត្រូវបានបិទ។ ទោះបីជាយ៉ាងណា Bailly ទើបតែបន្តកុងត្រាថ្មីជាមួយនឹង Man Utd ប៉ុណ្ណោះកាលពីខែមេសា ដោយរូបគេអាចបង្ហាញបានត្រឹមតែ២១ដងប៉៉ុណ្ណោះកាលពីរដូវកាលចាស់ និងបានបង្ហាញខ្លួនត្រឹមតែ១០ដងប៉ុណ្ណោះក្នុងក្របខណ្ឌ Premier League៕
ប្រភពព័ត៍មាន៖ Sportsmole
