បរទេស៖ ក្លិប Juventus កំពុងតែជឿជាក់លើការចុះហត្ថលេខាជាមួយនឹងខ្សែបម្រើ Manuel Locatelli ក្រោយពីបានដាក់សំណើដ៏សមរម្យ ទៅកាន់ក្លិបស្ថិតក្នុងក្របខ័ណ្ឌ Serie A ដូចគ្នា គឺ Sassuolo។
នេះបើយោងទៅតាមការបញ្ជាក់របស់លោក Pavel Nedved ប្រធានក្លិប Juventus កាលពីថ្ងៃសៅរ៍។ Locatelli វ័យ២៣ឆ្នាំ បានធ្វើឲ្យមានការចាប់អារម្មណ៍ ក្នុងពេលចូលជំនួសកន្លែងរបស់ Marco Verratti អំឡុងពេលនៃព្រឹត្តិការណ៍ Euro ឆ្នាំ២០២០ ដោយបានស៊ុតបាល់បញ្ចូលទី២គ្រាប ក្នុងការប្រកួតវគ្គចែកពូលជាមួយនឹងក្រុមជម្រើសជាតិស្វ៊ីស។ នៅមុនពេលក្រុមខ្លួនដណ្តើមបានជ័យជម្នះក្នុងលទ្ធផល ២-១ លើក្រុម Monza កាលពីថ្ងៃសៅរ៍ ក្នុងការប្រកួតពាន Berlusconi Trophy លោក Nedved បានឲ្យដឹងថា៖ «យើងចង់បានកីឡាកររូបនេះ ហើយរូបគេចង់បានយើង។ យើងជឿជាក់ថា សំណើរបស់យើងគឺល្អ និងមានភាពយុវត្តិធម៌»។
លោក Massimiliano Allegri គ្រូបង្វឹករបស់ក្លិប Juventus ចង់បាន Locatelli លេងក្នុងតំបន់បម្រើរបស់លោក ហើយអតីតកីឡាកររបស់ក្លិប AC Milan រូបនេះ ក៏ចង់ផ្ទេរទៅកាន់ Turin ផងដែរ បើទោះបីសំណើនេះ ត្រូវបានចាត់ទុកថា តិចជាងតម្លៃខ្លួនដែលត្រូវបានរំពឹងទុក គឺចំនួន៤០លានអឺរ៉ូ (ស្មើនឹង៤៧លានដុល្លារអាមេរិក)។ លោក Nedved បានបន្ថែមទៀតថា៖ «យើងបានដាក់សំណើដ៏សមរម្យមួយ ស្របទៅតាមស្ថានភាពបច្ចុប្បន្ន។ យើងកំពុងតែរង់ចាំទាំងជឿជាក់។ យើងច់ងនាំមុខយករូបគេទៅកាន់ក្លិប Juventus»៕
ប្រភពព័ត៌មាន៖ Channel News Asia