បរទេស៖ ក្រុមបាល់ទាត់យុវជនប្រេស៊ីល នៅសល់ការជ័យជម្នះត្រឹមតែ២លើកទៀតប៉ុណ្ណោះ ដើម្បីឈ្នះមេដាយមាសអូឡាំពិក២លើកជាប់ៗគ្នា ក្រោយពីបានផ្តួលក្រុមជម្រើសជាតិអេហ្ស៊ីប ក្នុងលទ្ធផល ១-០ ក្នុងការប្រកួតអូឡាំពិក ទីក្រុងតូក្យូ កាលពីថ្ងៃសៅរ៍។
គ្រាប់បាល់ស៊ុតបញ្ចូលទីនៅតង់ទី១ ពីកីឡាករ Matheus Cunha បានជួយឲ្យក្រុមម្ចាស់ការពារតំណែងជើងឯកមួយនេះឈានទៅវគ្គពាក់កណ្តាលផ្តាច់ព្រ័ត្រ ដើម្បីប៉ះជាមួយនឹងក្រុមជម្រើសជាតិម៉ិកស៊ិក។ ស្របពេលជាមួយគ្នានេះ ក្រុមម្ចាស់ផ្ទះជប៉ុន នឹងត្រូវប៉ះជាមួយនឹងក្រុមជម្រើសជាតិអេស្ប៉ាញ ក្នុងការប្រកួតវគ្គ៤ក្រុមចុងក្រោយ១គូផ្សេងទៀត។
ក្រុមម្ចាស់ផ្ទះមួយនេះ បានផ្តួលក្រុមជម្រើសជាតិនូវែលសេឡង់ ដោយការស៊ុតបាល់ប៉េណាល់ ក្រោយពីទទួលបានលទ្ធផលស្មើ ០-០ ស្របពេលដែលក្រុមជម្រើសជាតិអេស្ប៉ាញបានវាយបកដើម្បីផ្តួលក្រុមជម្រើសជាតិកូតឌីវ័រ ក្នុងលទ្ធផល ៥-២ បន្ទាប់ពីនាទីបន្ថែម១៥នាទី២ដង។ បើទោះបីការប្រកួតនេះ បានបង្កើតឲ្យមានគ្រាប់បាល់សរុបដល់ទៅ៧គ្រាប់ក៏ដោយ ប៉ុន្តែ ការប្រកួតរបស់ក្រុមជម្រើសជាតិម៉ិកស៊ិក ជាមួយនឹងក្រុមជម្រើសជាតិកូរ៉េខាងត្បូង បានបង្កើតឲ្យមានគ្រាប់បាល់សរុបដល់ទៅ៩គ្រាប់ ក្រោយពីម៉ិកស៊ិក បានទទួលជ័យជម្នះក្នុងលទ្ធផល ៦-៣ ដើម្បីទៅជួបជប៉ុន ក្នុងវគ្គពាក់កណ្តាលផ្តាច់ព្រ័ត្រ។
បច្ចុប្បន្ន ក្រុមជប៉ុន ត្រូវការឈ្នះត្រឹមតែ១លើកទៀតប៉ុណ្ណោះ ដើម្បីឈ្នះមេដាយជាលើកដំបូងរបស់ខ្លួនក្នុងយុទ្ធនាការកីឡាបាល់ទាត់ផ្នែកបុរស បើគិតចាប់តាំងពីបានឈ្នះមេដាយសំរឹទ្ធ ក្នុងអូឡាំពិកឆ្នាំ១៩៦៨៕
ប្រភពព័ត៌មាន៖ BBC
